Raiffeisen: Da kanca hoda zołatavalutnyja reziervy Biełarusi abvalacca nižej za $3 miljardy
Analityki aŭstryjskaj bankaŭskaj hrupy Raiffeisen pierahledzieli prahnoz pa raźvićci biełaruskaj ekanomiki. Bankaŭskija analityki čakajuć zaraz bolš hłybokaje źnižeńnie VUP Biełarusi i prahnazujuć značnaje skaračeńnie zołatavalutnych reziervaŭ krainy.
Zhodna z abnoŭlenym prahnozam Raiffeisen, jaki pryvodzicca ŭ lipieńskim vypusku ekanamičnaha ahladu «Pryjorbanka», VUP Biełarusi ŭ 2015 hodzie źnizicca na 3,5%.
Varta zaznačyć, što raniej bankaŭskija analityki aŭstryjskaj bankaŭskaj hrupy prytrymlivalisia bolš spryjalnaha prahnozu. Viasnoj hetaha hoda jany čakali, što VUP Biełarusi źnizicca tolki na 2%, a ŭ pačatku hoda prytrymlivalisia aficyjnaha prahnozu ŭładaŭ, jaki nie praduhledžvaŭ źnižeńnia VUP u realnym vyražeńni ŭ 2015 hodzie.
Prahnoz pa inflacyi ŭ Biełarusi Raiffeisen skarektavaŭ u lepšy bok. Zhodna ź lipieńskimi acenkami Raiffeisen, spažyvieckija ceny ŭ 2015 hodzie ŭ respublicy mohuć vyraści na 17% (raniej analityki aŭstryjskaj bankaŭskaj hrupy čakali, što inflacyja ŭ Biełarusi składzie sioleta 23%).
Analityki Raiffeisen pierahledzieli taksama, ale ŭ bok značnaha paharšeńnia, prahnoz pa dynamicy zołatavalutnych rezrievaŭ Biełarusi.
Ciapier analityki aŭstryjskaj bankaŭskaj hrupy prahnazujuć, što reziervy krainy skarociacca da kanca hoda da 2,8 młrd dołaraŭ. Raniej Raiffeisen čakaŭ, što biełaruskija ŭłady zmohuć zachavać u 2015 hodzie reziervy na ŭzroŭni, jaki byŭ u pačatku hoda (5,1 młrd dołaraŭ).
Miž tym biełaruskija ekanamisty miarkujuć, što ekanamičnyja ŭłady ŭ asobie ŭrada i Nacbanka zrobiać usio mahčymaje, kab nie dapuścić rezkaha źnižeńnia zołatavalutnych reziervaŭ, niahledziačy na značnyja vypłaty pa dziarždoŭhu ŭ druhim paŭhodździ.
«Źnižeńnie reziervaŭ z 4,6 młrd dołaraŭ na 1 lipienia da 2,8 młrd da kanca hoda vielmi surjoznaje. Kali reziervy pačnuć rezka źnižacca, pra heta ŭsie pačnuć pisać, nasielnictva pačnie chvalavacca i nieviadoma jak reahavać. Tamu takoha značnaha źnižeńnia reziervaŭ nichto nie dapuścić», — upeŭnienaja navukovy dyrektar Daśledčaha centra IPM Iryna Tačyckaja.
Staršy analityk foreks-brokiera Forex Club Valeryj Pałchoŭski prytrymlivajecca takoj ža dumki i zaznačaje, što ŭ hod prezidenckich vybaraŭ rezkaje źnižeńnie reziervaŭ małavierahodnaje.
«Źnižeńnie reziervaŭ da ŭzroŭniu mienšaha za adzin miesiac impartu — vielmi niehatyŭny scenaryj dla luboj krainy. Tamu možna čakać, što ŭrad budzie imknucca vypłačvać daŭhi za košt refinansavańnia, a nie za košt vyklučna reziervaŭ», — prahnazuje Pałchoŭski.
Kamientary