Taćciana Karatkievič: My kraina ŭ centry Jeŭropy, i pavinny hetym karystacca

U Homieli 12 žniŭnia pabyvała patencyjalny kandydat u prezidenty Taćciana Karatkievič.

Jana naviedała pikiety pa zbory podpisaŭ i pahutaryła z žycharami abłasnoha centra. Na pikietach na placoŭcy kala AAT «Kamintern» i ŭniviermaha «Homiel», niahledziačy na 35-hradusnuju haračyniu, było šmatludna. 

Ludzi aktyŭna fatahrafavalisia z mahčymym kandydatam, zadavali mnostva pytańniaŭ. U pryvatnaści, hamialčan cikaviła staŭleńnie Taćciany Karatkievič da rasijskich vajennych baz u Biełarusi, rostu cen, jaje bačańnie pieramien u krainie, refarmavańnia sistemy adukacyi, miedycyny, sudoŭ i milicyi.

Palityk zajaviła, što treba padtrymlivać piensijanieraŭ i ludziej z abmiežavanymi mahčymaściami, dabivacca taho, kab ludzi byli ŭpeŭnieny ŭ budučyni, moładź nie źjazdžała, a novyja siemji — budavalisia.

U vypadku pieramohi na vybarach Taćciana Karatkievič i jaje kamanda majuć namier praciahvać budavać partniorskija adnosiny z Rasijaj i «farmiravać adnosiny i ź Jeŭrapiejskim sajuzam, i z Prybałtykaj, i z Ukrainaj». 

«My kraina ŭ centry Jeŭropy, i pavinny hetym karystacca. Čamu ŭ Rasii vizy ŭ ES tańniejšyja, čym u nas? Heta niespraviadliva», — ličyć Taćciana Karatkievič.

Jana abiacała hamialčanam dabivacca, kab u biełarusaŭ było bolš mahčymaściej atrymlivać «jakasnyja pracoŭnyja miescy», kab miedycyna i adukacyja byli dastupnymi i jakasnymi i kab «ułada pavažała ludziej na ŭsich uzroŭniach». Patencyjalny kandydat ličyć, što na miedycynu i adukacyju treba vydzialać bolš srodkaŭ.

«My siońnia nie možam paŭpłyvać na toje, što budzie ŭ pratakołach, ale my budziem vielmi mocna staracca i aktyŭna da hetaha zaklikajem usich hramadzian, što varta iści na vybary i varta iści naziralnikam.

Ale my havorym, što my paśla dnia vybaraŭ nie skončym svaju pracu, u nas marafon za mirnyja pieramieny — voś naša meta», — padkreśliła palityk.

Adkazvajučy na pytańni pradstaŭnikoŭ ŚMI, Taćciana Karatkievič skazała, što jaje nie kryŭdzić, kali niekatoryja žurnalisty nazyvajuć jaje hienierataram štampaŭ.

Pavodle słoŭ patencyjalnaha kandydata, jana — pravasłaŭnaja, ale nie źjaŭlajecca prychadžankaj niejkaha chrama.

«Ja prytrymlivajusia chryścijanskich kaštoŭnaściej, kali prymaju rašeńni, razmaŭlaju ź ludźmi, heta značyć hety stryžań unutry mianie, hetyja kaštoŭnaści. Ja nie dumaju, što heta treba abaviazkova ŭsim (naviedvańnie carkvy. — BiełaPAN.), u hetym płanie ja svabodny čałaviek. Mnie adčynieny dźviery ŭ luby chram, dzie ja mahu pabyć sam-nasam z saboj, pahutaryć z Boham, paprasić parady abo pamalicca za kaho-niebudź», — adznačyła palityk.

Jana dadała, što ŭ Homieli jaje «lubiać bolš za ŭsio».

«Šmat ludziej pryjšło, ludzi z zadavalnieńniem spyniajucca, zadajuć pytańni, uvahu akazvajuć», — dadała Karatkievič.

Siońnia jana naviedvaje jašče Dobruš, zaŭtra, 13 žniŭnia, — Rečycu i Śvietłahorsk.

• 0
• 0
• 0
• 0
• 0
• 0
• 0
• 0