Paryž kančatkova admoviŭsia pieradavać viertalotanoscy typa «Mistral» Rasii i moža pradać ich inšym zacikaŭlenym krainam, paviedamiła krynica va ŭradzie Francyi haziecie Le Monde.
Płanavałasia, što ŭnikalnyja dla rasijskaha fłotu karabli buduć pieradavacca Maskvie pačynajučy ź listapada 2014 hoda, adnak kantrakt byŭ zabłakavany paśla ahresii RF suprać Ukrainy.
Ciapier u karabloŭ mohuć źjavicca inšyja pakupniki.
«Jehipiet i Saudaŭskaja Aravija całkam hatovyja kupić abodva «Mistrali», — skazał francuzski ŭradoviec.
Paviedamlajecca, što Saudaŭskaja Aravija hatovaja prafinansavać pakupku karabloŭ Jehiptam, kab uzmocnić biaśpieku na Mižziemnamorji i na Čyrvonym mory.
«Niekatoryja krainy hetaha rehijonu vielmi zacikaŭlenyja ŭ «Mistralach», kab pavialičyć svaju marskuju mahutnaść», — skazaŭ čynoŭnik.
Saudaŭskaja Aravija padtrymlivaje ščylnyja suviazi ź Jehiptam, u tym liku akazvaje jamu finansavuju dapamohu ŭ pamiery $4 młrd na hod. Francyja taksama pradaje Jehiptu źniščalniki Rafale i bajavyja karabli — frehaty i karviety.
Nie vyklučana taksama, što «Mistralami» zacikaviacca Kanada, Indyja i Sinhapur, jakija ŭ svaju čarhu padymajuć pytańnie ab pavieličeńni svajho vajenna-marskoha patencyjału.
Univiersalnyja desantnyja karabli typu «Mistral» mohuć prymać na bort da 450 čałaviek desantu (na karotki čas — da 900 čałaviek), 16 viertalotaŭ.
Jany mohuć vykarystoŭvacca jak bajavyja desantnyja karabli-viertalotanoscy ci jak mabilnyja marskija špitali, a taksama dla evakuacyi mirnaha nasielnictva z kanfliktnych zon. «Mistrali» zdolnyja być mabilnym marskim štabam, vykidvać marskija desanty, zmahacca ź piractvam, z marskoj kantrabandaj narkotykaŭ i ź nielehalnaj mihracyjaj.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary