Statkieviču dazvolili patelefanavać žoncy

Eks-kandydat u prezidenty Biełarusi, palitźniavoleny Mikałaj Statkievič, jakomu 12 žniŭnia spaŭniajecca 59 hadoŭ, patelefanavaŭ siońnia svajoj žoncy Marynie Adamovič. 

Jak paviedamiła Adamovič, jon, u pryvatnaści, prakamientavaŭ zajavu Alaksandra Łukašenki pra mahčymaść jaho daterminovaha vyzvaleńnia. 

4 žniŭnia padčas intervju «Jeŭraradyjo», «Radyjo Svaboda» i partału tut.by Łukašenka zajaviŭ, što pytańnie pra Statkieviča moža być vyrašana najbližejšym časam. «Ja nie stanu chitravać, heta pytańnie na paradku dnia. Vyrašyć heta mahu tolki ja. Ale ja nie vyznačaŭsia, kali heta budzie. Ja heta pytańnie ŭ takim klučy nie razhladaŭ. Kali jaho vypuskać, to vypuskać da vybaraŭ. Kali nie vypuskać, to nie vypuskać. Najbližejšym časam vy budziecie pra heta viedać», — skazaŭ kiraŭnik dziaržavy. 

«Mikałaj skazaŭ, što heta padobna na abjavu ŭ haziecie «Iz ruk v ruki». Pavodle jaho mierkavańnia, heta zajava — čarhovaja sproba vytarhavać niejkija bonusy i kredyty», — skazała žonka źniavolenaha palityka. 

Statkievič taksama paviedamiŭ, što da jaho nie dachodziać vinšavalnyja pasłańni. «Na siońnia jość vinšavalny list ad amierykanskaha pasolstva i try telehramy. Chutčej za ŭsio, vinšavańni prosta zatrymlivajuć. Ad tych ludziej, jakija mnie asabista paviedamlali, što adpravili listy ŭ turmu, ja viedaju, što ich pavinna być značna bolš», — adznačyła Maryna Adamovič. 

Statkievič skazaŭ, što viedaje pra kampaniju salidarnaści, zapuščanuju ŭ sacsietkach da dnia jaho naradžeńnia — siońnia ŭ «Fejsbuku» karystalniki raźmiaščajuć dla źniavolenaha palityka fatahrafii nieba, jakoje jon nie bačyć u turemnaj kamiery. 

Heta ŭžo piaty dzień naradžeńnia, jaki Mikałaj Statkievič adznačaje za kratami. U mai 2011 hoda sud Leninskaha rajona Minska pryhavaryŭ jaho da šaści hadoŭ pazbaŭleńnia voli, pryznaŭšy vinavatym u arhanizacyi masavych biesparadkaŭ u dzień vybaraŭ prezidenta 19 śniežnia 2010 hoda. 

Statkieviču dvojčy rabili bolš žorstkim režym adbyvańnia pakarańnia za parušeńnie praviłaŭ unutranaha rasparadku i nievykanańnie patrabavańniaŭ kiraŭnictva kałonii. Pieršy raz jon byŭ pieraviedzieny na try hady sa škłoŭskaj kałonii № 17 u mahiloŭskuju turmu ŭ studzieni 2012 hoda. U studzieni 2015-ha palityka viarnuli ŭ škłoŭskuju kałoniju, a ŭ mai — znoŭ adpravili ŭ mahiloŭskuju turmu. Tam Statkievič pavinien znachodzicca da kanca terminu pakarańnia, jaki minaje ŭ śniežni 2016 hoda. 

Mižnarodnyja arhanizacyi pryznali jaho palityčnym źniavolenym. 

Sioleta pradstaŭniki šerahu apazicyjnych struktur sfarmiravali inicyjatyŭnuju hrupu pa vyłučeńni Statkieviča kandydatam u prezidenty Biełarusi, adnak CVK jaje nie zarehistravaŭ, matyvavaŭšy svaju admovu sudzimaściu palityka. 

Statkieviču nieadnarazova prapanoŭvali napisać prośbu ab pamiłavańni na imia Alaksandra Łukašenki, adnak asudžany palityk kateharyčna admaŭlajecca heta rabić. 

• 0
• 0
• 0
• 0
• 0
• 0
• 0
• 0