Ułady sfabrykavali śpis kandydataŭ u prezidenty jašče da pačatku prezidenckaj honki, tamu pavinny pačać vybarčuju kampaniju nanova. Pra heta ŭ intervju BiełaPAN zajaviŭ były palitviazień, eks-kandydat u prezidenty Biełarusi na vybarach 2010 hoda Mikałaj Statkievič, jaki vyzvaliŭsia 22 žniŭnia na padstavie ŭkaza prezidenta ab pamiłavańni.
Pa słovach Statkieviča, jon i niekatoryja lidary demsiłaŭ sychodziacca ŭ mierkavańni, što ŭłady «ŭsimi dastupnymi srodkami sfabrykavali vybarčy śpis». «Jany dadali častku kandydataŭ, jakija nie sabrali podpisy, jany nie dazvolili źjavicca adzinamu kandydatu praz svaju ahienturnuju sietku, vykarystoŭvajučy naturalnyja ambicyi palitykaŭ. U rešcie rešt, vykarystoŭvajučy svaje dypłamatyčnyja kanały, jany pieraškodzili finansavańniu, resursnaj padtrymcy mahčymych sapraŭdy apazicyjnych kandydataŭ», — ličyć były palitviazień.
Takim čynam, na jaho dumku, ułady sami pakazali, što «vybaraŭ niama», i hramadstva na heta «adreahavała apatyjaj».
«Naša ahulnaja pazicyja: vybary nielha ličyć lehitymnymi jašče da ich pačatku, — padkreśliŭ Statkievič. — My pavinny patrabavać taho, kab ułady admatali vybarčuju kampaniju nazad, kab vybarčy praces pačaŭsia z pačatku, z rehistracyi inicyjatyŭnych hrup kandydataŭ. Nie budu razvažać z nahody realnaści vykanańnia hetaha patrabavańnia, ale za heta my budziem zmahacca. Mahčyma, my skažam hramadstvu, što vybaraŭ niama, i chadzić na ich niama sensu, ale treba, pakul jašče nie prajšła hetaja kampanija, pakul nie adbyłosia toje, što płanujecca, publična, hałosna patrabavać admieny rehistracyi kandydataŭ i pačatku vybarčaha pracesu».
Sam Statkievič maje namier damahacca svajho adnaŭleńnia ŭ hramadzianskich i palityčnych pravach, kab udzielničać u zapuščanaj znoŭku prezidenckaj kampanii, kali takoje zdarycca. Jon pierakanany, što maje prava na ŭdzieł, bo «nie zrabiŭ nijakaha złačynstva».
«Za mnoj ludzi, u mianie jość niemały rejtynh, mianie padtrymała dosyć vialikaja inicyjatyŭnaja hrupa. Ja viedaju, jak i maje kalehi, jak vyvieści Biełaruś z kryzisu. Ja patrabuju realizacyi svajho prava i prava tych ludziej, jakija mianie vyłučali. Ja budu zmahacca za heta svajo prava, vykarystoŭvajučy ŭsie dastupnyja lehalnyja z punktu hledžańnia mižnarodnaha zakanadaŭstva, a nie biełaruskich niezrazumiełych zakonaŭ, svajho nieadjemnaha prava», — skazaŭ vyzvaleny palityk.