Ministerstva sportu Rasii zaćvierdziła zahad ab lehijanierach u rasijskim chakiei. Ab hetym paviedamlajecca na aficyjnym sajcie viedamstva. Zhodna z dakumientam kolkaść hulcoŭ, jakija nie majuć prava vystupać za zbornyja Rasii, moža składać nie bolš jak piać u zajaŭcy adnoj kamandy. Asobna status chakieistaŭ z krain Mytnaha sajuza (MS) nie prapisany.
«Ministerstvam sportu RF sumiesna ź Fiederacyjaj chakieja Rasii padrychtavany zahad «Ab zaćviardžeńni abmiežavańniaŭ na ŭdzieł spartsmienaŭ, jakija nie majuć prava vystupać za spartyŭnyja zbornyja kamandy Rasijskaj Fiederacyi, va ŭsierasijskich spartyŭnych spabornictvach pa vidzie sportu «chakiej», — havorycca ŭ paviedamleńni.
Hetym zahadam praduhledžana, što ahulnaja kolkaść spartsmienaŭ, zajaŭlenych u kamandu rasijskaha spartyŭnaha kłuba na ŭdzieł u čempijanacie Kantynientalnaj chakiejnaj lihi, jakija nie majuć prava vystupać za spartyŭnyja zbornyja kamandy RF, pavinna być nie bolš jak piać, u tym liku nie bolš jak adzin varatar.
Asobna status hulcoŭ z Armienii, Biełarusi, Kazachstana, Kyrhyzstana ŭ dakumiencie nie prapisany. Raniej Kantynientalnaja chakiejnaja liha (KCHŁ) abjaviła ab namiery nie ličyć biełaruskich, kazachstanskich, armianskich i kirhizskich hulcoŭ lehijanierami na padstavie pryjarytetu mižnarodnaha prava — Dahavora Mytnaha sajuza.
U pieršych matčach čempijanatu KCHŁ kłuby, jakija majuć u svaim składzie biełarusaŭ, zadziejničali ich zvyš ustanoŭlenaha limitu. U pryvatnaści, heta datyčycca «Spartaka», «Naftachimika» i «Poŭnačstali».
Taksama zahadam Minsportu byli zaćvierdžany limity ŭ inšych lihach: u čempijanacie i pieršynstvie Vyšejšaj chakiejnaj lihi kolkaść spartsmienaŭ, jakija nie majuć prava vystupać za spartyŭnyja zbornyja Rasii, zajaŭlenych za kamandu rasijskaha kłuba, pavinna być nie bolš jak čatyry, u tym liku nivodnaha varatara; u čempijanacie Žanočaj chakiejnaj lihi — nie bolš jak čatyry, u tym liku nivodnaha varatara; u čempijanacie i pieršynstvie Maładziožnaj chakiejnaj lihi zajaŭka spartsmienaŭ, jakija nie majuć prava vystupać za zbornyja RF, zajaŭlenych za kamandu rasijskaha kłuba, zabaroniena.
«Hetyja abmiežavańni ŭvodziacca ŭ intaresach spartyŭnych zbornych kamand RF pa chakiei z metaj pradastaŭleńnia bolšaj kolkaści hulniavoha času rasijskim chakieistam dla ich naležnaj padrychtoŭki da mižnarodnych spartyŭnych spabornictvaŭ», — havorycca ŭ paviedamleńni Minsportu Rasii.
Zahad ustupaje ŭ siłu z 28 žniŭnia 2015 hoda.
Jak paviedamlajuć infarmahienctvy, niekatoryja kłuby KCHŁ abjavili ab namiery skasavać kantrakty ź biełaruskimi chakieistami. U pryvatnaści, sa spasyłkaj na pradstaŭnikoŭ kiraŭnictva maskoŭskaha «Spartaka» paviedamlajecca, što buduć skasavany pahadnieńni z abaroncami Dźmitryjem Korabavym i Andrejem Antonavym. Administracyja padmaskoŭnaha «Viciazia» płanuje admovicca ad pasłuh abaroncy Ilji Šynkieviča.
Čempijanat KCHŁ startavaŭ 24 žniŭnia.
«My vielmi hetaha chočam, my nastojvajem» — pres-sakratarka Łukašenki raskazała, ci pojdzie toj na nastupnyja vybary11
Kamientary