Stvaralniki World of Tanks ukłali hrošy ŭ rasijskuju rakietu

Suzasnavalnik biełaruskich raspracoŭščykaŭ hulniaŭ Wargaming Siarhiej Burkatoŭski, taksama viadomy jak «Serb», ukłaŭ 5 młn rasijskich rubloŭ (kala 75 tysiač dalaraŭ) u rasijskuju kampaniju «Lin Indastryjał», paviedamlaje Firrma.ru sa spasyłkaj na fond «Skołkava» (jaki vydatkavaŭ anałahičnuju sumu). Startavyja inviestycyi kampanii raniej pradstaviŭ vice-prezident Wargaming Viačasłaŭ Makaraŭ.

Zasnavanaja ŭ 2014 hodzie «Lin Indastryjał» stvaraje siamiejstva zvyšlohkich kaśmičnych rakiet «Tajmyr», zdolnych vyvodzić na arbitu spadarožniki masaj ad 10 da 180 kh. Heta pieršaja i adzinaja rasijskaja pryvatnaja kampanija-raspracoŭščyk kaśmičnych rakiet.

Pieršaja rakieta ŭžo vyrablenaja, jana była pradstaŭlenaja na avijasałonie «Maks-2015». Pieršy kaśmičny zapusk «Tajmyra» zapłanavany na 2020 hod.

Kab vyjści na akupalnaść, kampanii spatrebiacca inviestycyi ŭ 8,5 młn dalaraŭ. Heta moža adbycca praz 2,5 hoda paśla pieršaha kaśmičnaha zapusku.

Ci moža vykarystoŭvacca «Tajmyr» u vajennych metach, nieviadoma.

Pavialičyć

«Tajmyr» moža vyvodzić na arbitu niašmat hruzu — u hetym jaje hałoŭnaja asablivaść. Z rostam papularnaści nanaspadarožnikaŭ kštałtu CubeSat popyt na takija zapuski maje vyraści. Chacia nanaspadarožniki zapuskajuć i na vialikich rakietach (kštałtu Falcon 9), małyja rakiety dazvolać rabić bolš apieratyŭnyja zapuski, nie čakajučy patrebnaha pa paramietrach zapusku vialikaj rakiety.

Stvaralniki rakiety śćviardžajuć, što «Tajmyr» — rekardsmien pa lohkaści siarod sučasnych rakiet. Ale padobna, što daloka nie rekardsmien pa canie.

Cana «Tajmyra» za kiłahram hruzu nazyvajecca davoli vysokaja — da 60 tysiač dalaraŭ. Zvyšlohkaja rasijskaja rakieta «Štyl», stvoranaja na bazie balistyčnaj rakiety padvodnych łodak, pa niekatorych źviestkach moža vyvodzić kiłahram nahruzki za dziasiatak tysiač dalaraŭ, a ŭ pierśpiektyvie — za paŭtysiačy na kiłahram. Dva kaśmičnych zapuski «Štyla» byli paśpiachova praviedzienyja ŭ 1998 (tady na arbitu vyvieli spadarožniki na 3 i 8,5 kh) i 2006 (86 kh) hadach, ciapier ich płanujuć prystasavać da zapuskaŭ z samalotaŭ. Płany pa kaśmičnych zapuskach «Štylaŭ» dakładna nie akreślenyja.

Prajekt SpaceX pa stvareńni zvyšlohkaj rakiety Falcon 1e, što dazvalała by vyvodzić na arbitu hruzy za tysiaču dalaraŭ na kiłahram, byŭ prypynieny praź nizki popyt. Kankurent SpaceX, Virgin Galactic płanuje pravieści testavy zapusk svajoj zvyšlohkaj rakiety LauncherOne u 2016 hodzie, cana za kiłahram hruzu składzie nie bolš za 44 tysiačy dalaraŭ i budzie padać z rostam popytu.

Na vialikich rakietach cana za kiłahram hruzu užo siońnia značna nižejšaja: 5 tysiač na «Sajuzie», 4 tysiačy na Falcon 9.

• 0
• 0
• 0
• 0
• 0
• 0
• 0
• 0