Biełaruski hruzapieravozčyk učyniŭ pierformans na MAKS-2015

Jak raskazaŭ sam spadar Štoda, jamu nie biez składanaściaŭ, ale ŭdałosia zaleźci ŭ kabinu vajskovaha samalota-źniščalnika, jaki ekspanavaŭsia ŭ ramkach vystavy. Tam jon razharnuŭ samarobny plakat z nadpisam «Łukašenka! Patrabujem amnistyi BelToll», a kalehi zrabili niekalki zdymkaŭ. Pieraškodaŭ z boku arhanizataraŭ udałosia paźbiehnuć.

Raniej Siarhiej Štoda vykłaŭ u Fejsbuku zdymak fury na fonie znaku apłaty BelToll. Uzdoŭž borta pryčepa była prymacavanaja raściažka z dataj prezydenckich vybaraŭ i nastupnym tekstam: «11.10.2015 —? Łukašenka! Dzie abiacanaja amnistyja? Patrabujem admianić płatnyja darohi ad BelToll».

Siarhiej Štoda — adzin ź lideraŭ pakryŭdžanych BelToll'am pieravozčykaŭ. Za pieršyja miesiacy pracy ŭ novych umovach «najeździŭ» na 10 tysiač eŭra štrafaŭ. Pa jaho słovach, ad samaha pačatku systema pracavała sa zbojami: bartavyja prystasavańni nie spracoŭvali pry prajeździe pad bramami ci davali niapravilnyja źviestki pra transpartny srodak. Ale kiroŭcy pra heta navat nie zdahadvalisia — paviedamleńni pra «parušeńni» pačali prychodzić praź niekalki miesiacaŭ, abskardzić ich nie było mahčymaści.

Padmanutyja kiroŭcy i pieravozčyki prapanavali ŭradu pravieści «amnistyju» — skasavać štrafy za pieršyja miesiacy pracy systemy, kali da jaje tolki pryzvyčajvalisia. U inšym vypadku, papiaredžvali jany, nieadekvatnyja spahnańni pryviaduć da bankructva pradprymalnikaŭ. Hruzapieravozčyki abvinavacili ŭłady ŭ sprobie źniščyć niedziaržaŭny sektar mižnarodnych transpartnych pasłuhaŭ — kala 5 tysiač jurydyčnych asobaŭ stali zakładnikami BelToll.

Spačatku Ministerstva transpartu pahadziłasia anulavać štrafy, ale paźniej dało zadni chod. U lutym na znak pratestu Siarhiej Štoda zaklikaŭ hruzapieravozčykaŭ na akcyju la Domu ŭradu, dzie paabiacaŭ učynić publičnaje spalvańnie furaŭ. Za dzień da pryznačanaj daty Štodu zaprasili na sustreču ź vice-premjeram — nibyta abmierkavać umovy «amnistyi» — a ŭ vyniku aryštavali na 15 sutak. Abvinavačańnie tradycyjnaje — «łajanka ŭ publičnym miescy».

Kab zmahacca z BelToll, byŭ zasnavany Sajuz biełaruskich hruzapieravozčykaŭ «Vośmy rehijon». Pakul hramadzkaje abjadnańnie nie zarehistravanaje, ale, jak kaža Siarhiej Štoda, placoŭka moža stać ahulnaj dla abmierkavańnia šerahu rezanansnych momantaŭ, siarod jakich — funkcyjanavańnie systemy płatnych daroh, pamiery transpartnaha myta, abaviazkovyja sertyfikaty dla pradprymalnikaŭ i skasavańnie dekretu «ab darmajedach».

• 0
• 0
• 0
• 0
• 0
• 0
• 0
• 0