Kitaj adznačaje 70-hodździe pieramohi nad Japonijaj, što aznačaje kaniec Druhoj suśvietnaj vajny, hrandyjoznym paradam ŭ centry Piekina.
Adkryvajučy parad, kiraŭnik KNR Si Czińpin abviaściŭ u svajoj pramovie, što Kitaj skarocić kolkaść svaich uzbrojenych siłaŭ na 300 tysiač čałaviek.
Narodna-vyzvalenčaja armija Kitaja ličycca samaj vialikaj armijaj u śviecie: jaje asabisty skład pieravyšaje dva miljony vajskoŭcaŭ.
«Vopyt vajny prymušaje ludziej jašče bolš šanavać mir. Niahledziačy na toje, jak buduć raźvivacca padziei, Kitaj nikoli nie budzie imknucca da panavańnia, Kitaj nikoli nie budzie imknucca da pašyreńnia i nikoli nie prymusić inšych pieražyvać trahiedyi, jakija pieranios jon», — cytuje słovy lidara Kitaja ahienctva Asašyejted Pres.
Bolšaść zachodnich lidaraŭ ustrymalisia ad naviedvańnia ŭračystych mierapryjemstvaŭ u Kitai, adnak u Piekin pryjechaŭ rasijski prezident Uładzimir Pucin i kiraŭnik Biełarusi Alaksandr Łukašenka, kiraŭnik Kazachstana Nazarbajeŭ.
Kitajskija ŭłady surjozna padrychtavalisia da padziei — na čas paradu spynieny ruch transpartu pa centralnych vulicach kitajskaj stalicy, žycharam centralnych rajonaŭ zahadana nie vychodzić z kvater, niekatorym navat zabaroniena hladzieć u vokny.
Pa ŭsioj krainie telekanałach zabaroniena pakazvać zabaŭlalnyja šou na praciahu piaci dzion.
U paradzie ŭdzielničajuć 12 tysiač vajskoŭcaŭ i 500 adzinak techniki.
U Kitai śćviardžajuć, što meta mierapryjemstvaŭ — ušanavańnie vielizarnych achviar, pryniesienych hramadzianami krainy padčas vajny. Adnak na Zachadzie parad ŭžo nazvali demanstracyjaj siły Narodnaj armii Kitaja ŭ pieryjad, kali Piekin znoŭ pradjaŭlaje svaje terytaryjalnyja pretenzii ŭ Paŭdniova-Kitajskim mory.
Kamientary