Nuncyj Hudžeroci abvierhnuŭ vizit Łukašenki ŭ Vatykan: Papa nie sustrakajecca z prezidentami, termin paŭnamoctvaŭ jakich kančajecca
Vyzvaleńnie biełaruskich palitviaźniaŭ i mahčymy vizit Alaksandra Łukašenki ŭ Vatykan — absalutna nie źviazanyja pamiž saboj rečy, zajaviŭ u Homieli apostalski nuncyj Kłaudya Hudžeroci.
«Heta (vyzvaleńnie palitviaźniaŭ) było zroblena pa niepasrednaj prośbie papy. My hetym hanarymsia, tamu što heta pryniesła ŭ niekatoraj stupieni mir i harmoniju ŭ dziaržavie. Ja rady, što biełaruskaje hramadstva acaniła hetyja dziejańni papy», — zaznačyŭ pasoł Vatykana.
Jon abvierh infarmacyju ab mahčymym vizicie Alaksandra Łukašenki ŭ Vatykan u vieraśni 2015 hoda i nahadaŭ, što papa nie sustrakajecca z prezidentami, termin paŭnamoctvaŭ jakich padychodzić da zaviaršeńnia (vybary projduć 11 kastryčnika).
U pačatku lipienia były ministr zamiežnych spraŭ Słavakii, palityčny analityk Pavieł Dziemieš paviedamiŭ u intervju «Radyjo Svaboda» pra mahčymy vizit Łukašenki ŭ Vatykan. Jon taksama prahnazavaŭ, što pierad hetaj pajezdkaj Łukašenka moža vyzvalić Mikałaja Statkieviča. «Ja schilny dumać, što Łukašenka vypuścić jaho pierad svajoj pajezdkaj da papy rymskaha ŭ vieraśni hetaha hoda abo adrazu paśla jaje», — zajaviŭ tady eks-dypłamat.
Pra hatoŭnaść Vatykana pryniać Łukašenku zajaŭlaŭ kardynał Pjetra Paralin padčas pryjezdu ŭ Minsk u sakaviku hetaha hoda. Pavodle jaho słoŭ, mahčymaść arhanizacyi takoha vizitu abmiarkoŭvałasia padčas jaho sustreč z pradstaŭnikami biełaruskich dziaržorhanaŭ.
Apostalski nuncyj Kłaudya Hudžeroci ŭ składzie delehacyi dypłamataŭ 2—3 vieraśnia naviedvaje Homiel. Vizit arhanizavała pradstaŭnictva Upraŭleńnia viarchoŭnaha kamisara AAN pa spravach biežancaŭ. Meta — aznajomić dypłamatyčnuju supolnaść Biełarusi ź situacyjaj vakoł biežancaŭ i asob, jakija šukajuć prystanišča.
Prahrama vizitu ŭklučaje sustreču z kiraŭnictvam abłvykankama i harvykankama, pradstaŭnikami UUS i inšych struktur. Delehacyja naviedała punkt časovaha raźmiaščeńnia, sacyjalnaj adaptacyi i reabilitacyi biežancaŭ, sustrełasia ź siryjskimi i ŭkrainskimi siemjami.
Apostalski nuncyj pravioŭ taksama sustreču z homielskimi katolikami.
Kamientary