Va ŭstanovach achovy zdaroŭja Biełarusi sabrałasia bolš za 50 ton nieprydatnych cytastatyčnych procipuchlinnych preparataŭ, paviedamiła na pres-kanfierencyi ŭ Minsku 3 vieraśnia zahadčyca łabaratoryi prafiłaktyčnaj i ekałahičnaj taksikałohii Navukova-praktyčnaha centra hihijeny Iryna Iljukova.
Pavodle jaje słoŭ, cytastatyčnyja preparaty adnosiacca da niebiaśpiečnych adkidaŭ i patrabujuć spalvańnia pry tempieratury vyšej za 1200 hradusaŭ abo, kali spalvańnie niemahčymaje, zachavańnia ŭ hiermietyčnaj mietaličnaj kapsule na palihonie niebiaśpiečnych adchodaŭ.
U Biełarusi jość adzin taki palihon — u Čačersku (Homielskaja vobłaść), adnak pryjom adchodaŭ na im abmiežavany, i cytastatyčnyja preparaty nazapašvajucca ŭ miedycynskich ustanovach.
«Na žal, niahledziačy na toje što va ŭsich miedycynskich ustanovach dla zachoŭvańnia cytastatykaŭ vydzialajecca asobny pakoj biez dostupu pabočnych asob, pry tempieratury vyšej za 25 hradusaŭ źmieściva cytastatyčnych preparataŭ navat z hiermietyčnych kapsuł pastupaje ŭ navakolnaje asiarodździe», — skazała Iljukova.
Pakolki palikliniki i balnicy zvyčajna raźmieščanyja ŭ hustanasielenych rajonach, uździejańnie cytastatykaŭ źviedvajuć i pacyjenty, i zvyčajnaje nasielnictva, dadała jana.
Śpiecyjalist skazała, što ŭ Biełarusi jość šeść ustanovak, zdolnych utylizavać cytastatyčnyja preparaty, ale nie ŭsie ź ich adpaviadajuć patrabavańniam. «Uličvajučy, što ŭtylizavać tonu cytastatyčnych adkidaŭ vielmi doraha i ŭtylizacyju adchodaŭ apłačvaje ŭłaśnik, heta značyć balnica abo paliklinika, jakaja ich vyrabiła, to jany šukajuć, dzie tańniej utylizavać adchody, — adznačyła zahadčyca łabaratoryi. — Nie zaŭsiody ŭ miedustanoŭ jość mahčymaść adšukać hrošy na ŭtylizacyju adchodaŭ, časam byvaje praściej zachoŭvać».
Pavodle słoŭ načalnika cecha abiasškodžvańnia adchodaŭ KUP «Ekares» Rusłana Chursika, spalvańnie adnaho kiłahrama cytastatyku kaštuje 58800 rubloŭ. «Cytastatyki — heta realnaja prablema. Imi zabityja ŭsie centry. Hetyja adchody nielha vykinuć, viadziecca ich ulik, i, kab śpisać preparat, nieabchodna padać dakumient, što jon utylizavany», — rastłumačyŭ śpiecyjalist.
Mahutnaść KUP «Ekares» dazvalaje pierapracoŭvać 370 ton cytastatykaŭ u hod, adnak vytvorčaść zadziejničanaja nie poŭnaściu, adznačyŭ Chursik. Pry najaŭnaści srodkaŭ pradpryjemstva zdolnaje pierapracavać usie nazapašanyja cytastatyki mienš jak za hod.
