Śledčy kamitet patłumačyŭ, čaho nielha rabić, kab nie trapić za parnahrafiju ŭ sacsietkach

Śledčy kamitet Biełarusi raźmiaściŭ 3 vieraśnia na svaim sajcie materyjał, jaki rastłumačvaje, što ŭsio ž źjaŭlajecca raspaŭsiudžvańniem parnahrafii i ŭ jakim vypadku pahražaje kryminalnaja adkaznaść. 

U im adznačajecca, što apošnim časam pry rasśledavańni kryminalnych spraŭ, źviazanych z raspaŭsiudžvańniem parnahrafii, śledčyja ŭsio čaściej sutykajucca z prablemaj, kali asoba, jakaja pryciahvajecca da kryminalnaj adkaznaści, nie ličyć, što pastaŭleny im «łajk» ci dabaŭlenaje sabie na staronku ŭ sacyjalnaj sietcy videa, jakoje źmiaščaje parnahrafičnyja materyjały, źjaŭlajecca złačynstvam. 

«Pieradusim treba razumieć, što heta nie tolki pieradača ci prodaž zabaronienych da abarotu pradmietaŭ, jakija źmiaščajuć parnahrafičnyja materyjały. Heta taksama raźmiaščeńnie i pieramiaščeńnie infarmacyi, jakaja ŭklučaje ŭ siabie materyjały parnahrafičnaha źmiestu, pry dapamozie sacyjalnych sietak, z telefona na telefon, — havorycca ŭ paviedamleńni. — Raspaŭsiudžvańnie parnahrafii praduhledžvaje pieradaču jaho choć by adnoj asobie, niezaležna ad sposabu (zbyt, dareńnie, abmien i inš.). Rekłamavańnie hetych materyjałaŭ zaklučajecca ŭ vystaŭleńni takich pradmietaŭ na ŭsieahulny ahlad abo paviedamleńnie infarmacyi pra ich, u tym liku praz hłabalnuju kampjutarnuju sietku internet». 

U SK adznačajuć, što, raźmiaščajučy ŭ siabie na staroncy rolik, jaki źmiaščaje elemienty parnahrafii, karystalnik spryjaje jaho raspaŭsiudžvańniu, bo videa znachodzicca ŭ svabodnym dostupie i jaho zmohuć ubačyć usie asoby, što naviedvajuć jaho staronku. 

Naprykład, u kancy lipienia hetaha hoda Rahačoŭskim rajonnym adździełam SK była raspačata sprava na padstavie č. 2 art. 343 KK u dačynieńni da maładoha čałavieka 1986 hoda naradžeńnia, jaki ŭ listapadzie 2014 hoda, znachodziačysia ŭ adnoj z sacyjalnych sietak, dadaŭ da siabie na staronku videazapis. Prahledzieŭšy jaho praź niekatory čas i pierakanaŭšysia ŭ tym, što jon parnahrafičnaha źmiestu, mier da abmiežavańnia dostupu da jaje nie pryniaŭ, pakinuŭšy ŭ siabie na staroncy, u suviazi z čym usie karystalniki hetaj sacyjalnaj sietki mahli jaje prahladać. 

Akramia taho, niadaŭna ŭ ŚMI fihuravała infarmacyja ab tym, što ŭ dačynieńni da maładoj dziaŭčyny z Homiela USK pa Homielskaj vobłaści była raspačata kryminalnaja sprava za nibyta niavinny kamientaryj, pakinuty paśla prahladu parnahrafii ŭ sacyjalnaj sietcy «UKantakcie». Hety kamientaryj byŭ pakinuty joju paśla taho, jak papiarednie jana dadała videa da siabie na staronku. «A sistema sacyjalnych sietak vybudavana takim čynam, što peŭnyja vašy dziejańni, u tym liku dadadzienaje videa, łajki, kamientaryi, zmohuć ubačyć u vašaj stužcy navin vašy siabry i padpisanty», — kanstatujuć u SK. 

Taksama prykładami, jakija časta sustrakajucca, źjaŭlajucca raźmiaščeńnie home video u internecie ci pieradača jaho treciaj asobie praź miesiendžara. 

U śledčaj praktycy taksama sustrakajucca vypadki, kali adbyvajecca ŭzłom akaŭnta karystalnika sacyjalnaj sietki i raźmiaščeńnie na jaho staroncy materyjałaŭ parnahrafičnaha źmiestu. U hetym vypadku pryciahnieńniu da kryminalnaj adkaznaści ŭ adpaviednaści ź dziejnym zakanadaŭstvam padlahaje asoba, jakaja ŭzłamała staronku i raźmiaściła na im videa. 

Z 2013 hoda ŭ krainie nazirajecca rost kolkaści złačynstvaŭ u śfiery raspaŭsiudžvańnia parnahrafii. Tak, u 2013 hodzie było raspačata 278 kryminalnych spraŭ, u 2014-m — 397, a za vosiem miesiacaŭ 2015 hoda ŭžo 404 kryminalnyja spravy.

• 0
• 0
• 0
• 0
• 0
• 0
• 0
• 0