Bielhijski horad pražyŭ 10 tydniaŭ z parkami zamiest vulic FOTA
Žychary paśpiachova pieražyli ekśpierymient.
Horad Hient u Bielhii pazbaviŭ siabie 22 vulic u samym centry — zamiest ich raźbili parki. Ekśpierymient pačaŭsia ŭ mai i doŭžyŭsia 10 tydniaŭ, paspaviadaje Fast Company.
Ekśpierymient daŭ žycharam Hienta mahčymaść pabačyć horad (i svajo žyćcio) biez mašyn. Niechta prosta parkavaŭ mašyny dalej ad domu, niechta pierasieŭ na rovar, a niechta adkryŭ dla siabie toje, što maje cikavych susiedziaŭ, ź jakimi prosta na vulicy možna papić kavy ci zhulać u futboł.
Ideja naradziłasia jašče try hady tamu, kali haradskija ŭłady spytali ŭ žycharoŭ ich bačańnie horadu budučyni. Žychary adkazali: zony biez mašyn vakoł centralnych płoščaŭ, raźvićcio hramadskaha transpartu i vieładarožak, žyvyja stasunki z susiedziami na vulicach.
Sioleta z dapamohaj «kreatyŭnaj łabaratoryi» Lab of Troy ideju ažyćciavili. U mai 22 vulicy ŭ sercy horada pieraŭtvaryli ŭ parki — žychary sami dapamahali pakłaści štučnuju travu, rasstavić kvietki, łaŭki i stołki.
«My jašče nie viediem nastupstvaŭ ekśpierymientu. Ale ja dumaju, što heta moža być zaklikam da abudžeńnia, što mašyny nie nastolki patrebnyja, jak ludzi dumajuć, — kaža Styvien Kłejs, jaki dapamahaŭ pieratvarać svaju vulicu ŭ park. — Adnym z asnoŭnych stratehičnych pytańniaŭ hetaha ekśpierymientu było toje, jak my možam arhanizavać naša budzionnaje žyćcio biez vykarystańnia aŭtamabilaŭ z takoj častatoj, jak siońnia».
Pa słovach Kłejsa, ekśpierymient prajšoŭ davoli paśpiachova, chacia pieršy čas žychary vulic-parkaŭ narakali na šum: centr horada pieratvaryŭsia ŭ niaspynnuju viečarynu. Dy susiedzi prymirylisia i prystasavalisia da žadańniaŭ adzin adnoha. «Dva miesiacy ekśpierymientu minuli, kantakty zastalisia», — kaža Kłejs.
Padobny ekśpierymient užo prachodziŭ u Paŭdniovaj Karei (u Paŭnočnaj jon mižvoli idzie mnohija hady — mašyn na vulicach niebahata), u chutkim časie projdzie ŭ Jochanesburhu (Paŭdniovaja Afryka).
U Minsku piešachodnaj čas ad času stanaviłasia vulica Karła Marksa (bolš nie budzie), u chutkim časie piešachodnym maje stać histaryčny centr: płošča Svabody, vulicy Revalucyjnaja, Kamsamolskaja, Hiercena, Kiryły i Miafodzija, na Dzień horada piešachodnaj stanie vulica Kastryčnickaja. Pra piešachodnyja vulicy ŭ inšych biełaruskich haradach niadaŭna raspaviadała «Radyjo Svaboda».
Kamientary