Jak Karatkievič adznačyła Dzień vajskovaj słavy pad kryžam i zorkaj FOTA
U Dzień vajskovaj słavy pretendent na udzieł u prezidenckich vybarach Taćciana Karatkievič razam ź siabrami svajoj kamandy pabyvała ŭ miastečku Hajna, što pad Łahojskam.
Tut u 1514 hodzie karol Žyhimont I naładziŭ žałobnaje nabaženstva pa zahinułych hierojach padčas Aršanskaj bitvy. Dvuch blizkich da siabie vajaroŭ — Stanisłava Aarona dy Stanisłava Niskoŭskaha pachavali pad ścienami vieličnaha hajnaŭskaha kaścioła. Karol mocna dapamoh jamu, ale z abaviazkam, «kab u pamiać podźvihu pad Voršaj probaščy štomiesiac pravili adnu imšu ab Naradžeńni Najśviaciejšaj Panny Maryi sa zhadkaj imionaŭ dvuch Stanisłavaŭ, što ŭ bitvie palehli».
Praz hod i piać stahodździaŭ na tym miescy — tolki kurhan z dvuma kryžami. Spadarynia Karatkievič i aktyvisty ŭskłali da ich kvietki.
— Miascovyja žychary raskazali, što słavuty kaścioł razburyli ŭ apošniuju vajnu: tut byŭ aporny punkt hitleraŭcaŭ… A «dabili» jaho ŭžo miascovyja ŭłady ŭ 1960-ch — paprostu zrujnavali… Kryžy tyja, darečy, pastaŭleny nie ź inicyjatyvy čynavienstva – heta sprava ruk nieabyjakavych hramadzian, dla kaho paniaćci pamiaci, historyi, honaru i hodnaści, patryjatyzmu nie prosta zaciortyja słovy, – prakamientavała Taćciana Karatkievič. — Ale ž litaralna ŭ piaci mietrach ad kryžoŭ ja znajšła ŭ śmietniku pomnik kapitanu miedycynskaj słužby Čyrvonaj armii Kazłovu Fiodaru Fiodaraviču, što zahinuŭ u 1944-m… Dziakuj Bohu, kryžy cełyja, ale čamu hetkaje staŭleńnie da pomnika? Pobač ža vialikaja miascovaja škoły z vydatnym krajaznaŭčym muziejem, niepadalok i sielsaviet, dyj rajvykankam u dziasiatku kiłamietraŭ. I nichto nie bačyć hetaj abyjakavaści…
Dzień vajskovaj słavy Biełarusi — i pad kryžam Aršanskaj bitvy z maskoŭskimi zachopnikami, i pad zorkaj apieracyi «Bahracijon» z fašysckimi «zvyšludźmi». Heta — adno cełaje. Nieparušnaje. Jak honar i hodnaść.
…Druhi bukiet kvietak Taćciana Karatkievič uskłała da pomnika tym amal 200 žycharam Hajny, jakija zahinuli za Baćkaŭščynu ŭ druhuju suśvietnuju. Jak dva Stanisłavy ŭ bitvie pad Voršaj.
Kamientary