Ukrainski žurnalist prapanavaŭ Parašenku šyrej vykarystoŭvać biełaruskuju movu
Za 90 dzion treba sabrać pad pietycyjaj 25 tysiač podpisaŭ.
Na aficyjnym internet-pradstaŭnictvie prezidenta Ukrainy źjaviłasia «Pietycyja pa spravie vykarystańnia biełaruskaj movy zamiest rasiejskaj u kantaktach z Respublikaj Biełaruś, u pryvatnaści na Ukrzaliźnicy [ukrainskaj čyhunki — NN]». Aŭtar pietycyi — ukrainski žurnalist polskaha pachodžańnia Jakub Łohinaŭ.
U pietycyi aŭtar prapanuje rabić paviedamleńni pra ruch ciahnikoŭ da abo ź Biełarusi pa-biełarusku, stvaryć biełaruskamoŭnuju viersiju staronki ukrainskaj ambasady ŭ Biełarusi, dadavać biełaruskamoŭnyja apisańni na etykietkach tavaraŭ, što ekspartujucca ŭ Biełaruś.
Kab Ukraina aficyjna razhladzieła pietycyju, pad joj majuć padpisacca 25 tysiač čałaviek. Pakul padpisalisia tolki try dziasiatki čałaviek. Pietycyja była padadzienaja 7 vieraśnia, na zbor podpisaŭ na momant publikacyi zastałosia 90 dzion.
U pietycyi aŭtar adznačaje, što Biełaruś zmahajecca z moŭna-kulturnaj daminacyjaj Rasii, biełaruskaja mova tryvaje vialiki cisk, a kraina — rusifikacyju. Na dumku aŭtara, adradžeńnie biełaruskaj movy jość nie tolki pytańniem źbieražeńnia kultury, ale i dziaržaŭnaj biaśpieki jak Biełarusi, tak i Ukrainy.
Tym časam sajt biełaruskaj ambasady va Ukrainie maje tolki adnu moŭnuju viersiju — pa-rusku. Pra ruch ukrainskich ciahnikoŭ na vakzale abviestki nie robiacca pa-ŭkrainsku. Biełaruskija tavary, što pastaŭlajucca va Ukrainu, pavinny mieć infarmacyju na etykietkach pa-ŭkrainsku.
Kamientary