Były palitviazień Mikałaj Statkievič paviedamiŭ «NN», što siońnia byŭ vyklikany na razmovu ŭ HUUS Minharvykankama. Pryčyna – 10 vieraśnia Statkievič płanuje pravieści pikiet kala HUMa z patrabavańniem svabodnych vybaraŭ.
«Ja znachodžusia na prafiłaktyčnym uliku i abaviazany źjaŭlacca ŭ milicyju. Siońnia mianie zaprasili ŭ 14:50 u HUUS Minharvykankama. Zaviali ŭ niejkuju zału, tam kuča videakamier. Siadzić sapraŭdny prezidyum na čale ź niejkim hienierał-majoram, padstryžanym pad vožyka.
Toj hienierał adrazu pačaŭ pramovu, što ja parušaju zakanadaŭstva, źbiraju niesankcyjanavany pikiet. Ja kažu: «Vy tak pramaŭlajecie natchniona, a ja vas navat nie viedaju, pradstaŭciesia».
Akazałasia, što heta načalnik minskaj milicyi Alaksandr Barsukoŭ.
Ja patłumačyŭ, što maju kanstytucyjnyja pravy, što ciapier idzie vybarčaja kampanija, maju prava abmiarkoŭvać. Chvilin 15 my pierabivali adzin adnaho. Barsukoŭ niešta pałymiana chacieŭ pramović na kamieru, a ja nie davaŭ jamu heta zrabić.
Vyśvietliłasia, što Barsukoŭ vielmi emacyjny čałaviek. Jon nastolki raschvalavaŭsia, što ŭščent zabyŭsia na ŭsie zamiežnyja movy, pačaŭ pramaŭlać pa-biełarusku. I vielmi dobra havaryŭ!
Prapanoŭvali padpisać niejkaje piśmovaje papiaredžańnie, ale ja admoviŭsia.
Ja skazaŭ, što milicyja pieratvaryła narod u zapałochany statak, a ja asabista takim nikoli nie budu. Barsukoŭ ža staŭ havaryć: «My da vas pa-čałaviečy pastavilisia vypuścili z turmy. Vy chočacie, kab vas znoŭ pasadzili». Nu-nu, ni da adnaho zabojcy tak nie stavilisia.
Uładzie vielmi chočacca lehitymnaści, ale nie dajuć mahčymaści ludziam navat źbiracca. Ja skazaŭ, što nie chvalujciesia, ja ž revalucyju nie pryznačaju.
Vy pavinny byli za 15 dzion padać zajaŭku, adkazvajuć. Nibyta vy dazvolicie, tolki dva razy na hod Banhałor dazvalajecie.
Ja ŭ dobrym humory syšoŭ ź milicyi. Staŭlusia da ŭsiaho hetaha ź ironijaj».
