Va Ukrainie zatrymany biełarus z bataljona «Tarnada» z pazyŭnym «Madžachied», jakoha abvinavačvajuć u ciažkich złačynstvach. Hałoŭny vajskovy prakuror Ukrainy Anatol Macios nazvaŭ jaho samym niebiaśpiečnym i žorstkim z bajcoŭ «Tarnada», što chavajucca. Nahadajem, što bataljon «Tarnada» byŭ raspuščany, a suprać niekatorych jaho bajcoŭ zaviedzienyja kryminalnyja spravy.
«Žorstka, ale biez stralby, śledčyja Hałoŭnaj vajskovaj prakuratury … u haściničnym kompleksie na Abuchoŭskaj trasie pad Kijevam, viečaram 9 vieraśnia adšukali i zatrymali samaha niebiaśpiečnaha i žorstkaha z usich padazravanych bajcoŭ roty «Tarnada» pa mianušcy Madžachied», — zajaviŭ Macios.
Jon adznačyŭ, što zatrymany Lašuk źjaŭlajecca hramadzianinam Biełarusi i chavaŭsia ad śledstva bolš za 2 miesiacy.
Taksama Macios paviedamiŭ, što zatrymany vyznaje kaštoŭnaści ekstremisckaj arhanizacyi Isłamskaja dziaržava.
Raniej žurnalisty pryjšli da vysnovy, što Lašuk, jaki raniej niejki čas žyŭ u Rasii i Krymie peŭny čas naležaŭ da pravaekstremisckich rasisckich arhanizacyj. Pa natury jon «chiejtar» — čałaviek, jakomu «treba kahości nienavidzieć», zrabili vysnovu žurnalisty.
Vyras jon u Breście, śpiavaŭ rep, udzielničaŭ u hrupoŭkach moładzi, pakul nie pierajechaŭ u Sievastopal. Tam jon pražyŭ dva hady. Daniła Lašuk prajšoŭ šlach ad nieanacyzmu da radykalnaha isłamizmu, abviaściŭ Rasii džychad i adpraviŭsia vajavać va ŭkrainski bataljon «Tarnada».
Tam jon byŭ paranieny, trapiŭ u špital.
«Mienavita «Madžachied»-Lašuk z nadzvyčajnym cynizmam i dziorzkaściu, žorstkaściu i biaźlitasnaściu ažyćciaŭlaŭ najbolš žorstkija katavańni miascovaha nasielnictva Łuhanskaj vobłaści, arhanizoŭvaŭ i braŭ niepasredny ŭdzieł u zhvałtavańni zatrymanych, jakich jon razam ź inšymi padazravanymi vykradaŭ z karyślivych mierkavańniaŭ», — zajaviŭ prakuror Macios.
Aryštavali jaho ŭ łaźni pad Kijevam, dzie jon adpačyvaŭ ź siabrami.
U kancy červienia ministr unutranych spraŭ Ukrainy Arsien Avakaŭ padpisaŭ zahad ab rasfarmiravańni hetaha bataljona. Vajennaja prakuratura aryštavała kamandzira bataljona Rusłana Aniščanka i siemiarych bajcoŭ. Ich abvinavačvajuć u niezakonnym pazbaŭleńni voli, utrymlivańni, vykradańni i katavańni miascovych žycharoŭ.
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»9
Kamientary