Andrej Kurejčyk — papularny biełaruski scenaryst i režysior. Aŭtar «Vyšej za nieba» i «HaraŠ».
«Sos! Mnie stała viadoma, što našaja dziaržava rychtuje novy zakon. Jak ja zrazumieŭ, łabijuje jaho spadarynia Dryha (namieśnica ministra kultury). Ničoha bolš biazdumnaha, dzikaha i škodnaha ja nie čytaŭ. Ukaz praduhledžvaje ŭviadzieńnie dazvolnaha paradku na stvareńnie kino, luboha kino. U takim vyhladzie heta poŭny i absalutny kryž na luboj tvorčaj inicyjatyvie. Takoha niama nidzie ŭ śviecie. Paśla hetaha ŭkazu kino ŭ hetaj krainie bolš nie budzie», — napisaŭ emacyjny post u svaim fejsbuku biełaruski režysior Andrej Kurejčyk.
U razmovie z žurnalistam «Našaj Nivy» Andrej patłumačyŭ, što prajekt ukazu patrapiŭ da jaho ad siabroŭ-čynoŭnikaŭ, imiony jakich jon nie choča nazyvać.
Zakon praduhledžvaje ŭzhadnieńnie ź ministerstvam kultury scenara, sinopsisa, składu zdymačnaj hrupy dy inšaha. Biez hetaha kino budzie nielehalnym. Aproč taho, za atrymańnie dazvołu na zdymku kino daviadziecca zapłacić — prajekt ukaza ŭtrymlivaje kankretnyja sumy z ulikam chranamietražu i kolkaści sieryj.
«Nas, niedziaržaŭnych kinošnikaŭ, robiać nielehałami. Takija prajekty jak «Vyšej za nieba» i «HaraŠ» ideałahična niepadparadkavanyja čynoŭnikam, tamu jany chočuć usio uziać pad kantrol i pakinuć miesca ŭ kiniematohrafie tolki «Biełaruśfilmu» i telekanałam», — padahulniŭ Andrej Kurejčyk.