Kiraŭnik Biełdziaržteleradyjokampanii Hienadź Davydźka kaža, što nazvaŭ nacystami zaŭziataraŭ, što byli na matčy va Lvovie, «zharača».
«Pra hetych fanataŭ, zaŭziataraŭ futbolnych — mnie niepryjemna, što tam nieparazumieńni jość. Nibyta pakryŭdzilisia na mianie, što ja nazvaŭ ich nacystami… Nu, heta ja «zharača», badaj što i prabačeńnia treba budzie paprasić», — skazaŭ jon u efiry Jeŭraradyjo.
Nahadajem, u apošnim vypusku prahramy «Kłub redaktaraŭ» abmiarkoŭvaŭsia futbolny matč zbornych Ukrainy i Biełarusi i pavodziny padčas jaho biełaruskich i ŭkrainskich zaŭziataraŭ. Hienadzia Davydźku aburyli «antyrasijskija kryčałki», jakija hučali padčas matču, i toje, što biełaruskija zaŭziatary achvotna ich padtrymlivali. «Čamu našu krainu na trybunach u susiedniaj krainie pradstaŭlajuć junyja nacysty?» — aburaŭsia kiraŭnik BT.
Adzin z zaŭziataraŭ zbornaj Biełarusi pa futbole apublikavaŭ u «Našaj Nivie» adkryty list kiraŭniku BT z nahody hetaha jaho vykazvańnia. Andrej Valkoŭski patrabuje ŭ svaim liście, kab Hienadź Davydźka pradstaviŭ dokazy svajmu abvinavačvańniu: «Ciažka sabie ŭjavić i toje, što Vy mahli b nazvać nacysckim sfarmulavany Jankam Kupałam łozunh «Žyvie Biełaruś», — piša jon i dadaje taksama, što «łozunh «Słava Ukrainie» siahaje vytokaŭ aśpiracyj ukrainskaj niezaležnaści ŭ novaj historyi i źviazvać jaho z nacyzmam mohuć tolki prapahandysty tendencyjnych telepieradač. Jašče mienš chočacca vieryć u toje, što Vy ŭsurjoz možacie ličyć pieśni biełaruskaha hurtu «Lapis Trubieckoj», «Try čarapachi» NRM, narodnuju «Kupalinku» ci typovyja biełaruskija fanackija kryčałki ŭ padtrymku zbornaj nacysckaj tvorčaściu. Heta było b ŭžo ŭvohule pa-za miežami… Byŭ jašče banier z prostym, ale adnaznačnym salidarnym źmiestam «Trymajciesia, braty». Chaciełasia b adznačyć, pavažany spadar Davydźka, što biełaruskija amatary futboła vykazali svaju salidarnaść ukrainskamu narodu ŭ rečyščy ahulnaha staŭleńnia Biełarusi da niaprostaj situacyi va Ukrainie», — piša Valkoŭski.
