Pryhavoram sudovaj kalehii pa kryminalnych spravach Mahiloŭskaha abłasnoha suda asudžany 45-hadovy mahilaŭčanin za ŭčynienaje im naŭmysnaje zabojstva z karyślivych pabudžeńniaŭ (p. 12 č. 2 art. 139 KK).
Jak paviedamiŭ BiełaPAN načalnik adździeła prakuratury Mahiloŭskaj vobłaści Siarhiej Minaŭ, u 2010 hodzie mužčyna byŭ asudžany za ŭčynieńnie dvuch naŭmysnych zabojstvaŭ z asablivaj žorstkaściu (u mikrarajonie Facina Mahilova ŭčyniŭ zabojstva dźviuch žančyn, cieły jakich rasčlaniŭ). U narodzie atrymaŭ mianušku «Facinski mańjak».
Adbyvajučy pakarańnie ŭ vyhladzie pažyćciovaha źniavoleńnia za ŭčynieńnie dvuch naŭmysnych zabojstvaŭ z asablivaj žorstkaściu, jon paviedamiŭ jašče pra adno zabojstva.
Złačynstva było ŭčyniena ŭ pieryjad z maja pa červień 1999 hoda ŭ vioscy Amchovaja-2 Mahiloŭskaha rajona. Achviaraj złačynstva stała dziaŭčyna 18—20 hadoŭ. Źviestki pra jaje asobu ŭstanavić nie ŭdałosia.
Padčas sudovaha pasiadžeńnia ŭstanoŭlena, što abvinavačvany paznajomiŭsia ź dziaŭčynaj i damoviŭsia ź joju sustrecca, kab razam adpačyć. Pry sustrečy dziaŭčyna skazała, što zarabiła nie mienš jak 2 młn. rubloŭ. Dla mužčyny suma była značnaj, tamu što jon praciahły čas nie pracavaŭ (byŭ dvojčy zvolnieny z AAT «Mahiloŭpramburvod»). Jon prapanavaŭ dziaŭčynie kupić śpirtnoje, zakusku i pajechać da jaho na daču ŭ Amchovuju-2.
Padčas raśpivańnia śpirtnych napojaŭ abvinavačvany prapanavaŭ padzialicca ź im hrašami, ale dziaŭčyna admoviłasia. Mužčyna nanios joj nie mienš jak try ŭdary rukoj u vobłaść hrudziej, a zatym staŭ dušyć. Pierakanaŭšysia, što dziaŭčyna miortvaja, trup rasčlaniŭ, častku cieła pachavaŭ na svaim prysiadzibnym učastku, častku — zakapaŭ za vioskaj. Rečy, pašpart i adzieńnie dziaŭčyny spaliŭ. Vykradzienyja 900 tys. rubloŭ patraciŭ na ŭłasnyja patreby.
Pakazańni ab złačynstvie abvinavačvany daŭ dobraachvotna padčas papiaredniaha śledstva. Aprača taho sam pakazaŭ, dzie pachavaŭ cieła paciarpiełaj. Adnak u dalejšym admoviŭsia ad svaich pakazańniaŭ i zajaviŭ, što hetaha złačynstva nie ŭčyniaŭ.
Sudom vina va ŭčynieńni zhadanaha złačynstva była pryznanaja dakazanaj, tamu što paćviardžałasia materyjałami kryminalnaj spravy, vysnovami sudovych ekśpiertyz.
Mahiloŭskim abłasnym sudom abvinavačvanamu pryznačana pakarańnie ŭ vyhladzie pazbaŭleńnia voli terminam na 15 hadoŭ.
Z ulikam taho, što 5 listapada 2010 hoda mužčyna byŭ pryhavorany da pažyćciovaha źniavoleńnia sudom kančatkova pryznačana pakarańnie ŭ vyhladzie pažyćciovaha źniavoleńnia z adbyvańniem u papraŭčaj kałonii asobaha režymu.
Z pryhavoram abvinavačvany nie pahadziŭsia i abskardziŭ jaho ŭ Viarchoŭnym sudzie. Sudovaj kalehijaj pa kryminalnych spravach VS skarha abvinavačvanaha pakinutaja biez zadavalnieńnia, pryhavor nabyŭ zakonnuju moc.
Kamientary