«Heta vajna i akupacyja krainy»: u Minsku prajšoŭ narodny schod suprać rasijskaj avijabazy VIDEA
Siońnia na płoščy Svabody ŭ Minsku, kala Ratušy, prajšła akcyja pratestu suprać raźmiaščeńnia ŭ Biełarusi rasijskaj avijabazy. Na jaje sabrałasia kala 500 čałaviek.
18:05
Ciapier udzielniki schodu śpiavajuć «Pahoniu» na słovy Bahdanoviča. Schod skončyŭsia. Ludzi razychodziacca. Płošča puścieje. Palityki razdajuć intervju žurnalistam. Akcyja skončana.
18:01
Na płoščy z susiedniaha sabora zabili zvany (tam pačałasia słužba). Ludzi pačali malicca, śpiavajuć «Mahutny Boža». Častka ludziej sychodzić u kaścioł, dzie maje adbycca «Malitva za Biełaruś».
Siarod udzielnikaŭ schodu — mastak Aleś Puškin. Ź im usie vitajucca. Pryjšli taksama Alaksandr Milinkievič z žonkaj.
17.57
Słova znoŭ biare Statkievič: «Kali b u naroda była ŭłada, ci dazvoliŭ by jon tut rasijskija bazy? Nie! Ale ŭ nas zabrali ŭładu, i my kocimsia ŭniz. U naroda niama ŭłady».
Statkievič zaprašaje ŭsich 10 kastryčnika, u 17:00, pryjści na apošni pieradvybarčy schod u Minsku, kab vyrašyć, što rabić dalej. Kali nas budzie mnoha, my piarojdziem u inšaje miesca, kaža jon, i tady my vyrašym, što rabić 11 kastryčnika.
Statkievič dziakuje ludziam, što pryjšli na płošču, a taksama nazyvaje kłoŭnami tych palitykaŭ, chto zaklikaje iści na vybary.
17:55
Alaksiej Maračkin: «Mnie 75 hadoŭ, ja pryjšoŭ siudy suprać baz, na mirny pratest, a na mianie składajuć pratakoł. Absurd niejki».
Niaklajeŭ: «Maračkin — adzin z vybitnych mastakoŭ, najlepšy syn naroda, a na jaho niejkija maładziony składajuć pratakoł. Nu što heta robicca, ludcy?»
17.47
Na pytańnie Siŭčyka, chto b moh stać novym lidaram nacyi, chto b zamianiŭ Łukašenku, ludzi skandujuć: «Mikoła, Mikoła».
Siŭčyk vystupaje dosyć praciahła i pałka. Pierad im stajać dva milicyjaniery. Urešcie ŭsio skančajecca składańniem na jaho pratakołu.
17.46
Na płoščy prysutničajuć supracoŭniki misii ABSIE ŭ Biełarusi.
17.42
Słova ŭziaŭ hramadski aktyvist Viačasłaŭ Siŭčyk. Kaža, što jaho nie było ŭ krainie 5 hadoŭ, a Biełaruś za hety čas mocna źmianiłasia.
Žančyna, jakaja trymaje płakat «Nam treba mirnaje nieba», zaznačaje ŭ kamientary NN, što nie žadaje, kab nad jaje hałavoj lotali vajskovyja samaloty, voś tamu jana i pryjšła na płošču.
Źmicier Daškievič: «Hałoŭnaje nie dapuścić, kab vajna pryjšła ŭ naš dom».
17.38
Statkievič zaklikaje dałučacca da ruchu Niaklajeva.
Niaklajeŭ źviartajecca da ludziej, što pryjšli na płošču. Jon kaža, što kožny z tych, chto pryjšoŭ na akcyju, moža stać udzielnikam hetaha ruchu. «Dziakuj usim vam», — kaža jon. Ludzi vitajuć jaho: «Žyvie Biełaruś».
Taksama prysutnyja pierydyčna ładziać abstrukcyju ludziam u cyvilnym i milicyjanieram: «Hańba! Hańba!» — hukajuć jany.
17:28
Niaklajeŭ abviaščaje pra stvareńnie svajho ruchu «Za dziaržaŭnaść i niezaležnaść Biełarusi». Abviaščajecca, što ŭ radu novaha ruchu ŭvojduć eks-palitviazień Juryj Rubcoŭ, mastak Alaksiej Maračkin, aktyvist z Kobryna Aleś Miech.
Niejki pravakatar imkniecca pierakryčać Niaklajeva. Ale Uładzimira Prakopaviča tak prosta nie pierakryčyš.
Pryjšoŭ chłopiec z ukrainskim ściaham. «Ja — hramadzianin Ukrainy, z Sumaŭ. Ja viedaju, što Rasija natvaryła na majoj radzimie, i nie chaču, kab heta paŭtaryłasia ŭ Biełarusi», — kaža jon.
17:26
Ludzi skandujuć «Nie čužym vajskovym bazam» i «Žyvie Biełaruś».
17:24
Na płoščy ciapier kala 400—500 čałaviek. Atmaśfiera nie napružanaja, raźniavolenaja.
Udzielniki ž schodu skardziacca, što varta adyści na niekalki dziasiatkaŭ mietraŭ ad pramoŭcaŭ i ničoha nie čuvać. Vynik taho, što ŭ apazicyi kanfiskujuć luboje hukaŭzmacnialnaje abstalavańnie.
17:18
Źjaviŭsia niejki dziŭny čałaviek, jaki pieryjadyčna zadajecca pytańniem: «Što treba rabić, što treba rabić?».
17:17
Alaksiej Janukievič (partyja BNF) kaža: «My pavinny ŭsie zajavić, nie — rasijskaj bazie». Na płoščy kala 400 čałaviek. Łunaje dziasiatak bieł-čyrvona-biełych ściahoŭ, ściahi ES, ściahi AHP.
Juraś Hubarevič (ruch «Za svabodu») zajaviŭ, što rasijskaja baza — heta pieršy krok da źjaŭleńnia zialonych čałaviečkaŭ, jakija zachopiać uładu ad vykankamaŭ da Minska.
17.09
Labiedźka kaža: «Nas usich uraziŭ zdymak ź Ńju-Jorka. Chto samy sumny ministr u śviecie? Chto heta? Heta Makiej. My nie pačuli z vusnaŭ Łukašenki, ni z vuśniaŭ Makieja pytańni ab biaśpiecy, što tut rabić».
«Budapiešcki miemarandum nie abaraniŭ Ukrainy, nie abaronić i Biełaruś. Ni Łukašenka, ni Makiej, ni Kola nie skazali pra heta ŭ Ńju-Jorku», — reziumavaŭ Labiedźka.
«Kali vy źjaviciesia na vybarčych učastkach 11 kastryčnika, to vy dajacie kart-błanš na raźmiaščeńnie vajskovych bazaŭ. Ni ŭ jakim razie nielha chadzić na ŭčastki», — zajaŭlaje lidar AHP.
17.08
Vystupaje Mikoła Statkievič: «Dyktatura — heta pahroza, — kaža jon. — Dyktatura šturchaje nas da hłabalnaj vajny. Łukašenka — heta vajna», — kaža jon. «Nie — vajnie!»
17.05
Niaklajeŭ: «Vitaju ŭsich, chto pryjšoŭ na plac Voli skazać «nie» rasijskim bazam. Niebiaśpieka nie kazačnaja, nie fantastyčnaja. Kali b nie było prykładu Ukrainy, Danbasa, to možna było b kazać, što, nu što takoha, nu pastaviać bazy. Šmat u śviecie čužych baz. Ale ŭ Krymie była rasijskaja baza, adkul zachapili častku terytoryi Ukrainy. Kali tam było takoje, to čamu ŭ nas nie moža być takoha?»
«Z taho boku adkul nas źbirajucca abaraniać, na nas nie napaduć. Ni Polšča, ni Litva, ni Łatvija nie buduć na nas napadać. My nie pavinny dapuścić».
17.01
Ludzi iduć da advarotnaha boku Ratušy, jak i tydzień tamu. Anatol Labiedźka ŭziaŭ miehafon.
Žančyna vybačajecca, što adkazvaje NN pa-rusku: «Ja suprać baz, bo baču, što adbyvajeccca hibrydny zachop Biełarusi, jak było z Krymam. Raźmiaščajučy bazu, my hublajem svoj suvierenitet», — kaža jana.
16.59
Zaraz na Płoščy kala 200 čałaviek. Šmat narodu ź bieł-čyrvona-biełymi ściahami, šalikami. Niekalki čałaviek z samarobnymi płakatami. Pryjšoŭ Mikoła Statkievič z žonkaj Marynaj Adamovič, Anatol Labiedźka.
16:51
Łukašenka byŭ spačatku suprać baz, kaža Niaklajeŭ, ale Pucin pazvaŭ jaho ŭ Sočy, cyknuŭ, i jon pahadziŭsia.
16.45
Pryjšoŭ na płošču Uładzimir Niaklajeŭ, Pavieł Sieviaryniec.
Niaklajeŭ kaža: «My pryjšli na płošču, kab skazać «nie» parušeńniu kanstytucyi, jak napisana ŭ art. 18. My nie źbirajemsia ni z kim vajavać, a kali my raźmieścim vajennyja bazy, to my hublajem svaju niejtralnaść. Treba kab hetaha nie stałasia».
Niaklajeŭ źviartajecca taksama da rasijskich žurnalistaŭ na ruskaj, kab lepiej zrazumieli: «Situacyja z bazami, jak susied prychodzić da susieda z nažom»
16.40
Na płoščy Svabody pakul znachodzicca kala 50 čałaviek. Ludzi ŭ cyvilnym stajać na vychadzie ź mietro i pa pierymietry płoščy.
Aŭtobus z amapaŭcami taksama staić.
16:39
Chešteh #noRussianBaseinBelarus u sacyjalnych sietkach vychodzić u top-lidary.
* * *
«Heta Rubikon»
«Damova ab raźmiaščeńni na terytoryi Biełarusi rasijskaj vajskovaj bazy moža być padpisanaja najbližejšym časam. Heta zhubny krok, jaki moža pryvieści da straty niezaležnaści Biełarusi. Heta zdrada našym nacyjanalnym intaresam, zdrada narodu i krainie», — havorycca ŭ zajavie nad nazvaj «Za Biełaruś biez čužych vajskovych baz».
Zajavu padpisali byłyja kandydaty ŭ prezidenty Uładzimir Niaklajeŭ i Mikałaj Statkievič, staršynia AHP Anatol Labiedźka, staršynia Partyi BNF Alaksiej Janukievič, namieśnik staršyni ruchu «Za svabodu» Juraś Hubarevič, staršynia ruchu salidarnaści «Razam» Viačasłaŭ Siŭčyk, aktyvist hramadzianskaj inicyjatyvy «Biełaruski ruch» Vacłaŭ Areška.
Dałučylisia da zajavy taksama sustaršynia chryścijanskich demakrataŭ Pavał Sieviaryniec, aktyvisty «Maładoha frontu» i pradstaŭniki biełaruskaj žanočaj partyi «Nadzieja».
Padpisanty zajavy dumajuć, što raźmiaščeńnie na terytoryi Biełarusi zamiežnaj vajskovaj bazy supiarečyć 18-mu artykułu Kanstytucyi Biełarusi, zhodna ź jakoj Biełaruś imkniecca da niejtralitetu.
Rasijski ŭrad 2 vieraśnia pryniaŭ prajekt pastanovy ab raźmiaščeńni na terytoryi Biełarusi rasijskaj avijacyjnaj bazy. Pavodle rasijskaha boku, pahadnieńnie budzie «spryjać arhanizacyi supolnaj achovy źniešniaj miažy Sajuznaj dziaržavy».
18 vieraśnia prezident Rasii Uładzimir Pucin padpisaŭ rasparadžeńnie ab padpisańni pahadnieńnia pamiž Rasijskaj Fiederacyjaj i Respublikaj Biełaruś ab rasijskaj avijacyjnaj bazie na terytoryi Biełarusi i daručyŭ Ministerstvu abarony Rasii pravieści z udziełam rasijskaha MZS pieramovy ź biełaruskim bokam. U dakumiencie siarod inšaha havorycca: «Pryniać prapanovu ŭrada Rasijskaj Fiederacyi ab padpisańni pahadnieńnia pamiž Rasijskaj Fiederacyjaj i Respublikaj Biełaruś ab rasijskaj avijacyjnaj bazie na terytoryi Respubliki Biełaruś. Paśla dasiahnieńnia damoŭlenaści padpisać ad imia RF zhadanaje pahadnieńnie, dazvoliŭšy ŭnosić u jaho prajekt, uchvaleny ŭradam RF, źmieny, jakija nie majuć pryncypovaha charaktaru», — havorycca ŭ rasparadžeńni Pucina. Raniej premjer-ministr Rasii Dźmitryj Miadźviedzieŭ zajaviŭ, što pahadnieńnie ab raźmiaščeńni ŭ Biełarusi rasijskaj avijabazy budzie padrychtavana i padpisana ŭ kamfortnyja dla Minsku i Maskvy terminy.
Maładafrontaŭcy prapanoŭvajuć udzielnikam akcyi uziać jak maha bolš bieł-čyrvona-biełych nacyjanalnych biełaruskich ściahoŭ. «Zrobim 4 kastryčnika na płoščy Svabody mora bieł-čyrvona-biełych ściahoŭ!» — kaža Jaŭhien Vaśkovič.
Apazicyja adzinaja ŭ nieprymańni namieru Rasii raźmiaścić u Biełarusi svaje samaloty. «Heta nie prosta niejkaja farmalnaja avijabaza — heta peŭny Rubikon, pierajšoŭšy jaki, nazad viarnucca budzie vielmi składana i kaštavać heta budzie vielmi doraha. My bačym, čym abiarnułasia rasiejskaja marskaja baza ŭ Krymie dla Ukrainy i tym samym moža abiarnucca takaja baza dla Biełarusi», — miarkuje palityk Alaksiej Janukievič.
Hladzi taksama: Avijabaza? Zaležyć tolki ad ciabie
18 vieraśnia prezident Rasii Uładzimir Pucin padpisaŭ rasparadžeńnie ab padpisańni pahadnieńnia pamiž RF i RB na terytoryi Biełarusi i daručyŭ Ministerstvu abarony Rasii pravieści z udziełam rasijskaha MZS pieramovy ź biełaruskim bokam.
«Niezavisimaja hazieta» sa spasyłkaj na svaje krynicy vykazała mierkavańnie, što baza zapracuje ŭžo sa studzienia 2016 h. u Babrujsku. Raniej u jakaści raźmiaščeńnia taksama nazyvalisia Baranavičy i Lida.
Deputaty hatovy ŭchvalić pahadnieńnie za miesiac
U svaju čarhu rašeńnie ab avijabazie pavinien uchvalić biełaruski parłamient, jaki sabraŭsia na čarhovuju siesiju 2 kastryčnika. U płanach zakanadaŭčaj dziejnaści na kastryčnik razhlad pahadnieńnia pa avijabazie nie paznačany, ale heta možna ŭpisać asobnym punktam.
«Tak, tearetyčna heta mahčyma, — skazaŭ u intervju Jeŭraradyjo deputat Pałaty pradstaŭnikoŭ Valeryj Baradzienia. — Bo pracedurna, ja dumaju, dla ŭsich hetych ratyfikacyj, abmierkavańniaŭ, padpisańniaŭ miesiac — bolš čym dastatkova. U hetym moc našaj ułady — što rašeńni mohuć prymacca vielmi apieratyŭna. I ŭzhadnieńni prachodziać taksama chutka. Kali treba, narady niepasredna ŭ Administracyi prezidenta, u Saŭminie — vielmi chutka ŭsio ŭzhadniajecca. Ščylnaja supraca zakanadaŭčaj i vykanaŭčaj ułady dazvolić u samyja ścisłyja terminy pryniać nieabchodnyja papiery».
Łukša raskazaŭ, na jakich umovach adbyvałasia pamiłavańnie2
Kamientary