Eŭraradyjo stali viadomyja padrabiaznaści pahoni za pjanym kiroŭcam 2 sakavika, jakoha ŭrešcie spynili kardonam z pryvatnych aŭtamabilaŭ ź ludźmi.
Načalnik respublikanskaj DAI Alaksandar Miendzieleŭ nazvaŭ dziejańni darožnych inspektaraŭ nieprafesijnymi i paviedamiŭ pra adstaŭki ŭ suviazi z hetym zdareńniem:
«Słužbovyja asoby, jakija adkazvajuć za prafesijnuju padrychtoŭku tych, chto ŭdzielničaŭ u zatrymańni, a mienavita, namieśnik načalnika adździeła DAI Kastryčnickaha RAUS Miensku i načalnik DAI Słuckaha RAUS vyzvalenyja ad zajmanych pasadaŭ. Supracoŭniki, jakija ŭdzielničali ŭ zatrymańni, heta supracoŭniki DAI Słuckaha i Kastryčnickaha RAUS, adchilenyja ad svaich pasadaŭ da zakančeńnia słužbovaha razboru».
Adnak u DAI Słucka pra adstaŭku načalnika i inspektaraŭ ničoha nia viedajuć. Pra heta Eŭraradyjo paviedamiŭ pres‑sakratar słuckaj milicyi Dźmitryj Siemibrataŭ:
«Na dadzieny momant nichto z supracoŭnikaŭ DAI Słuckaha RAUS nie adchileny ad pracy. Nam pakul nichto nie davodziŭ i nie dakładvaŭ, što my pavinny adchilać našych supracoŭnikaŭ. Nijakaj pravierki, u pryncypie, nichto nie pryznačaŭ. Pakul… Ja nie chaču śćviardžać, što ničoha hetaha nia budzie».
Jak paviedamiŭ pres‑sakratar, padčas pahoni pasažyry mašyny parušalnika i sam kiroŭca pakazvali supracoŭnikam DAI nieprystojnyja žesty.
Kamientary