Prezidenckija vybary 2015 hoda daŭno nie majuć adkrytych pytańniaŭ. Niama intryhi dla vybarščykaŭ, aktyvistaŭ, palitykaŭ, žurnalistaŭ ni ŭ Biełarusi, ni za jaje miežami. U čakańni dnia hałasavańnia naviedvalniki sacyjalnych sietak spaborničajuć u sarkastyčnym prahnozie vynikaŭ «vybaraŭ». Pa ironii, udzielniki hulni addajuć minimum 80% hałasoŭ dziejnamu kiraŭniku i takim čynam praciahvajuć spravu niekali skandalnaj pieśni «Sania ostanietsia s nami» ad Rockerjocker.
Zastajecca adno pytańnie, na jakoje jašče treba dačakacca adkazu. I hetaje pytańnie moža być klučavym uva ŭsioj kambinacyi z supiarečlivym kandydactvam Taćciany Karatkievič. Što skaža Karatkievič pra vyniki vybaraŭ?
Dla ŭłady jana nie źjaŭjalecca pahrozaj — ni siońnia, ni patencyjna. Pry hetym sama Karatkievič i jaje štab kateharyčna admaŭlajucca ad vychadu z honki. A Dźmitryjevym spalena stolki mastoŭ z apazicyjnymi strukturami.
Pakazalna, jak Dźmitryjeŭ vykručvajecca ŭ tym, jak patłumačyć palityčnuju prynaležnaść Karatkievič. Dla ŭnutrybiełaruskaj aŭdytoryi jon imkniecca vybudavać dystancyju ad «apazicyjnaha hieta». Adnak tady jakija palityčnyja siły nasamreč pradstaŭlaje Karatkievič?
U intervju «Biełaruskamu partyzanu» 2 vieraśnia Dźmitryjeŭ adździalaje Karatkievič ad apazicyi: «BNF syšoŭ, heta była apošniaja apazicyjnaja partyja, jakaja padtrymlivała Karatkievič aficyjna […] my ciapier nie budziem źviazanyja pa rukach ni radykalnaj rytorykaj BNF, ni admoŭnym imidžam apazicyjnych partyj».
Adnak napiaredadni dnia hałasavańnia ŭ intervju «SB. Biełaruś siehodnia» 7 kastryčnika Dźmitryjeŭ havoryć pra Karatkievič znoŭ jak pradstaŭnika apazicyi: «A pra situacyju ŭ apazicyi niadaŭna pačuŭ: Karatkievič zdoleła zrabić toje, čto nie mahli da jaje, — stała faktyčna adzinym kandydatam ad demakratyčnych siłaŭ i abjadnała ź ich nie prosta havorača-hrymiačych, a pracazdolnuju častku…»
«Havary praŭdu» i ŭłada buduć nastojvać na tym, što Taćciana Karatkievič usio ž źjaŭlajecca pradstaŭnikom apazicyjnych siłaŭ. Jaje acenka vynikaŭ vybaraŭ budzie pradstaŭlenaja režymam jak supolnaja pazicyja apazicyjnych siłaŭ, a hetaje značyć,što vybary buduć ličycca demakratyčnymi i spraviadlivymi.
Takim čynam, upieršyniu z 1994 hoda vyniki prezidenckich vybaraŭ u Biełarusi mohuć być pryznanyja zakonnymi kandydatam, jakaja vydaje siabie za «adzinaha pradstaŭnika demapazicyi».
Juryj Varoniežcaŭ, adzin z rehijanalnych lidaraŭ «Havary praŭdu», na svajoj staroncy ŭ Fejsbuku 7 kastryčnika zajaviŭ, što «sens bajkotu va ŭmovach sučasnaj Biełarusi zaklučajecca ŭ tym, kab u vynikovym pratakole Jarmošynaj jaŭka skłała nie 120 pracentaŭ, a ŭsiaho tolki 102». Takim čynam jon pryznaŭ, što padlik hałasoŭ budzie sfalsifikavany, adnak jaho bolš kłapocić efiekt bajkotu, čym udzieł u złačynstvie.
Dyk što, vychodzić, «Havary praŭdu» praz svajho kandydata Taćcianu Karatkievič asensavana saŭdzielničaje ŭ kryminalnym złačynstvie — falsifikacyi vybaraŭ — kali pahadžajecca brać udzieł u zahadzia sfalsifikavanym hałasavańni i śviadoma namahajecca pryciahnuć vybarcaŭ da hałasavańnia?
Kali na vybarach 2001, 2006, 2010 hadoŭ hałasy nie ličyli, ale była alternatyva ŭ vyhladzie mocnych apazicyjnych kandydytaŭ, to vybary 2015 hoda admietnyja tym, što ŭpieršyniu paśla prezidenckich vybaraŭ1994 hoda praŭdzivaj alternatyvy siarod kandydataŭ nie budzie. U hetym sensie prezidenckija vybary 2015 hoda prosta nie majuć anijakaha sensu.
