Dziaržaŭny litaraturny muziej Janki Kupały i Fiederalnaja nacyjanalna-kulturnaja aŭtanomija (FNKA) «Biełarusy Rasii» zaklučyli pahadnieńnie ab supracoŭnictvie. Adpaviedny dakumient 9 kastryčnika ŭ Minsku padpisali dyrektar muzieja Alena Laškovič i staršynia savieta aŭtanomii Siarhiej Kandybovič.
Pieršym z hetaj padziejaj tych, chto padpisaŭ pahadnieńnie, pavinšavaŭ ministr kultury Biełarusi Barys Śviatłoŭ. «Amal kožny kvartał-paŭhoda prachodziać mierapryjemstvy našych ustanoŭ, arhanizacyj sumiesna ź biełarusami zamiežža. Heta praktyka, ale treba heta, jak my pryvykli, pakłaści na papieru», — adznačyŭ čynoŭnik.
Jon skazaŭ, što apošnim časam usio čaściej u Minkultury źviartajucca supolnaści biełarusaŭ zamiežža, jakija žadajuć ustanavić kulturnaje supracoŭnictva ź Biełaruśsiu.
Ustanaŭleńnie supracoŭnictva pamiž Kupałaŭskim muziejem i FNKA Siarhiej Kandybovič paraŭnaŭ z pasadkaj «ziarniatka, ź jakoha ŭ kožnym biełaruskim sercy rasijanina vyraście paparać i praraście cudoŭnaj kvietkaj». «Biełarusy Rasii — heta addanyja syny svajoj histaryčnaj radzimy. Našy biełaruskija sercy bjucca va ŭnison z usim biełaruskim narodam, dzie pachavanyja našy prodki, dzie našy karani», — skazaŭ jon.
Adzin ź pieršych sumiesnych prajektaŭ, nad jakim pracujuć muziej i aŭtanomija biełarusaŭ u Rasii, datyčycca ŭstanoŭki pomnika Janku Kupału ŭ siale Piečyščy kala Kazani (Respublika Tatarstan), dzie biełaruski paet žyŭ razam ź siamjoj paśla evakuacyi ŭ pačatku Vialikaj Ajčynnaj vajny. Piečyščy stali apošnim prystankam Kupały — nieŭzabavie jaho čakała fatalnaja pajezdka ŭ Maskvu, dzie jon zahinuŭ pry tajamničych akaličnaściach. Ciapier u hetym tatarskim siale raźmieščany adziny ŭ Rasii muziej Kupały.
Alena Laškovič raskazała, što ŭstanavić pomnik paetu ŭ Piečyščach płanujecca ŭ 2017 hodzie. Biełaruski skulptar Pavieł Vajnicki biaspłatna stvaryŭ eskizy pomnika. Zaraz nieabchodna znajści architektara, jaki b padrychtavaŭ kancepcyju pa dobraŭparadkavańni vyznačanaj terytoryi, a taksama finansavyja srodki dla stvareńnia pomnika.
Aŭtary prajekta spadziajucca, što ź finansavańniem dapamoža Ministerstva kultury Biełarusi.