Alaksandr Łukašenka pryniaŭ udzieł u hałasavańni na vybarčym učastku № 1 Centralnaha rajona Minska. U čas razmovy z žurnalistami dziejučy kiraŭnik dziaržavy daŭ acenku niekatorym z svaich apanientaŭ.
«Prezident u našaj krainie zajmajecca mnohimi pytańniami - ad biaśpieki da ekanomiki, jakija čałaviek u spadnicy pakul, napeŭna, nie zmoža vykonvać, a kali i zmoža, to naša hramadstva da hetaha jašče nie hatova. A toje, što žančyna vyłučyłasia, ja vielmi rady, heta narmalna. Pryčym ja panaziraŭ - tak, apazicyjanier, ale nie kryčyć ža krykam — na płošču, łamać, kryšyć», — vykazaŭsia jon pra Taćcianu Karatkievič.
Na jaho dumku, Karatkievič «całkam narmalny razumny čałaviek. U jaje jość svajo razumieńnie, jak u toj ža Aleksijevič».
![](http://nnexpictures.fra1.digitaloceanspaces.com/img/w732d4webp1/photos/z_2015_10/karatkevichtacciana24-x7hla.jpg.webp)
Alaksandr Łukašenka adznačyŭ, što ŭ Biełarusi ŭ mnohich ludziej jość ułasnaje mierkavańnie i prezident nie źbirajecca ź imi vajavać, a budzie pierakonvać. Jon nahadaŭ, što ŭ 2010 hodzie dla Biełarusi «byŭ padrychtavany Majdan», i pra toje, jak u 2006 hodzie «narkatu i šprycy dastavali z namiotaŭ».
«Kali zaraz złamali Ukrainu, vy zrazumieli, što Łukašenka ŭ 2010 hodzie mieŭ racyju? Voś vybary i pakažuć — mieŭ racyju Łukašenka ci nie», - zajaviŭ dziejny kiraŭnik.
Adkazvajučy na pytańnie, ci hatovy jon prapanavać Karatkievič jakuju-niebudź pasadu, Łukašenka adznačyŭ: «Važna žadańnie pracavać na dziaržavu i prafiesijanalizm».
«Ja pahladžu, na što vy zdolnyja, jaki ŭ vas vopyt i što vy možacie paciahnuć na svaich plačach, jaki chamut, toj i paviešu vam na šyju», - uśmichnuŭsia Łukašenka.
«Nie chvalujciesia, nam vielmi patrebnyja prafiesijnyja i talenavityja ludzi. Ale jana niejak zajaviła, maŭlaŭ kali ja z KDB b supracoŭničała, to mianie b mužyk b maŭlaŭ … (nie zrazumieŭ - zaŭv. Red.) Nu, dumaju, Haspodź z taboj, Taćciana, kali ty idzieš u prezidenty, ty ŭžo nie vykazvajucca tak — my viedajem, chto tvoj muž. U «Zubry» jon ci dzie? Krajni apazicyjanier. I kali ty stanieš prezidentam, chto budzie kiravać krainaj? Radykalny «zubryst»? Ci ty?» — pacikaviŭsia Łukašenka.
Jon vykazaŭ mierkavańnie, što takich zajaŭ palityk rabić nie pavinien.
Kamientary