Šuškievič: Rady za Aleksijevič, ale zvańnia Hieroja Biełarusi bolš varty Statkievič

Były staršynia Viarchoŭnaha Savietu Stanisłaŭ Šuškievič nia byŭ u Miensku i nia zmoh pavinšavać Śviatłanu Aleksijevič z prysudžeńniem joj Nobeleŭskaj premii.

Paśla viartańnia ŭ Biełaruś jon vykazaŭ karespandentu Svabody svajo staŭleńnie da hetaj padziei:

— Ja prosta ščaślivy, što pryniali takoje rašeńnie, bo ja vidavočna daŭžej za inšych viedaju «Ŭ vajny nie žanočy tvar», «Cynkavyja chłopčyki». Na mianie takoje ŭražańnie zrabili hetyja tvory, jak u svoj čas «Adzin dzień Ivana Dzianisaviča». I tut ja vinavaty pierad Śviatłanaj Alaksandraŭnaj, što ja dalej nie sačyŭ za jaje tvorčaściu. Ja vyrašyŭ, što hetaha chopić. Nia viedaju, ci pamiataje jana, što ja byŭ u takim zachapleńni, što kali nam patrebien byŭ staršynia Kanstytucyjnaha sudu, moj siabra Leŭ Kamaroŭ, zahadčyk katedry tearetyčnaj fizyki, skazaŭ: paprasi hetuju žančynu być staršynioj Kanstytucyjnaha sudu. Ja joj telefanavaŭ i pra heta kazaŭ, nia viedaju, ci pamiataje jana pra heta. Tak što ja ciešusia.

A ciapier, što adbyłosia? Hetuju premiju prysudzili, kali ja byŭ u Safii na samicie byłych i siońniašnich kiraŭnikoŭ peŭnych postsavieckich, asabliva bałkanskich dziaržaŭ. I kali hetaja navina pryjšła, to mnie były prezydent Juščanka skazaŭ: nu, ty nia vielmi hanarysia, bo jana i nam naležyć, jana naradziłasia ŭ Ivana-Frankoŭsku. Ja kažu — u Stanisłavie, heta potym jon užo staŭ vašym Ivana-Frankoŭskam. I my vyrašyli, što nam chopić Śviatłany Aleksijevič i na adnaho, i na druhoha. Ja vielmi škaduju, što nia mieŭ mahčymaści jaje pavinšavać, bo datelefanavacca da jaje nia zmoh. To bok dziakuj bohu, što vy patelefanavali. Choć usie buduć viedać, što ja vielmi ciešusia z hetaj padziei.

Heta vialikaje dasiahnieńnie. Dobra, što ŭ hety čas heta adbyłosia. I jaje cudoŭnyja słovy pra toje, što jość Beryja, Stalin, Pucin…

— Alaksandar Łukašenka choć i pavinšavaŭ Śviatłanu Aleksijevič, adnak zvańnia «Hieroj Biełarusi» jana pakul nie atrymała…

— Ja padzialiŭ by hetyja padychody. Ja dumaju, što Mikoła Statkievič maje bolš padstaŭ na siońniašni dzień, niachaj prabačyć mianie Śviatłana Alaksandraŭna, być Hierojem Biełarusi. Ja liču, što jość asoby, jakija majuć bolš padstaŭ być staršyniami Kanstytucyjnaha sudu, čym Aleksijevič. Jana zajmajecca svajoj pracaj, i dobra jaje asvoiła. Davajcie nia budziem joj pieraškadžać. Zaprosim Skobłu, jašče jakoha dobraha biełaruskamoŭnaha pierakładčyka, i niachaj buduć pierakłady na biełaruskuju movu. Vialiki Bykaŭ — a heta ŭpuščeńnie Nobeleŭskaha kamitetu, što Bykavu nie prysvoili premiju Nobeleŭskaha kamitetu, — sam pierakładaŭ svaje tvory na ruskuju movu. I ničoha drennaha ŭ hetym nia baču.

• 0
• 0
• 0
• 0
• 0
• 0
• 0
• 0