U Minsku byŭ zatrymany, źbity i aštrafavany błohier Viktar Nikicienka
U Minsku byŭ zatrymany pravaachoŭnymi orhanami, źbity i aštrafavany błohier Viktar Nikicienka.
Jak paviedamlaje pravaabarončy sajt spring96.org, Nikicienka byŭ zatrymany 13 kastryčnika. U 13.30 błohier pryjšoŭ na płošču Niezaležnaści z dvuma siabrami, jakich paprasiŭ sfatahrafavać jaho na fonie Doma ŭrada z płakatam «Łukašenku pad trybunał». Takim čynam Nikicienka chacieŭ «danieści da ludziej» svajo staŭleńnie da čarhovaha prezidenckaha terminu Alaksandra Łukašenki.
Za dziejańniami maładych ludziej nazirali niekalki čałaviek u cyvilnym. Adzin ź ich pacikaviŭsia, što adbyvajecca, i paprasiŭ Nikicienku pakazać dakumienty. U adkaz błohier paprasiŭ nieznajomca nazvać siabie i taksama pakazać dakumienty, ale toj pajšoŭ, ničoha nie skazaŭšy ŭ adkaz.
Praz paŭhadziny Nikicienka ź siabrami vyrašyli pakinuć płošču. «Na leśvicy, jakaja viadzie ŭ padziemny pierachod, mianie schapili za ruki i nasilna paciahnuli ŭniz. Viadoma, ja supraciŭlaŭsia i patrabavaŭ pakazać mnie svaje paśviedčańni. Mianie ciahnuli na druhi bok, dzie ŭžo čakaŭ bieły aŭtobus», — cytuje błohiera pravaabarončy sajt. Pavodle słoŭ Nikicienki, jaho źnievažali, zapałochvali i bili. Na svajoj staroncy ŭ «Fiejsbuku» Nikicienka vykłaŭ svoj zdymak, dzie bačnyja ślady pabojaŭ u rajonie nyrak.
U adździaleńni milicyi Nikicienku pratrymali amal dźvie hadziny. U toj ža dzień sud Maskoŭskaha rajona Minska pryznaŭ jaho vinavatym u praviadzieńni niesankcyjanavanaha pikieta, a taksama ŭ niepadparadkavańni patrabavańniam rabotnikaŭ milicyi i źniavazie sudździ. Błohiera aštrafavali na 20 i 30 bazavych vieličyniaŭ adpaviedna, što ŭ sumie składaje 9 młn. rubloŭ.
Supracoŭniki Čyhunačnaha adździaleńnia milicyi admovilisia pryniać u Nikicienki zajavu ab raspačynańni kryminalnaj spravy ŭ suviazi z prymianieńniem hrubaj fizičnaj siły, pahrozami i źniavahami z boku pravaachoŭnych orhanaŭ. Błohieru prapanavali źviarnucca ŭ Hienprakuraturu.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary