Udzielnika akcyi 11 kastryčnika buduć sudzić za niecenzurnuju łajanku
Sud Maskoŭskaha rajona stalicy 16 kastryčnika razhledzić administracyjnuju spravu ŭ dačynieńni da maładoha lidčanina Artura Žuka, jaki ŭdzielničaŭ u stychijnaj apazicyjnaj akcyi viečaram 11 kastryčnika ŭ centry Minska.
Jak paviedamiŭ BiełaPAN Artur Žuk, 15 kastryčnika da jaho na pracu na Minski zavod kołavych ciahačoŭ pryjšli dva milicyjaniery ŭ cyvilnym adzieńni.
«Jany skłali pratakoł i pieradali mnie pozvu ŭ sud. Biaruć mianie, nakolki ja zrazumieŭ, za toje, što niecenzurna łajaŭsia. Zapytaŭ, što mnie pahražaje, skazali: jak vyrašyć sud, heta značyć abo sutki, abo štraf», — raskazaŭ małady čałaviek.
U asnoŭny dzień hałasavańnia na prezidenckich vybarach 2015 hoda paśla aficyjnaha zakryćcia vybarčych učastkaŭ na Kastryčnickaj płoščy ŭ Minsku stali źbiracca ludzi, niazhodnyja z vynikami vybaraŭ. Za niekalki hadzin ich kolkaść vyrasła ź niekalkich dziasiatkaŭ prykładna da 300 čałaviek.
Udzielniki akcyi pierajšli na płošču Niezaležnaści, dzie adbyŭsia karotki mitynh. Nieŭzabavie ludzi stali razychodzicca.
U dačynieńni da adnaho z udzielnikaŭ akcyi, što zastalisia na płoščy, 17-hadovaha školnika Jahora Skrabnieŭskaha, adzinaha, chto byŭ ź bieł-čyrvona-biełym ściaham, milicyjaniery stali składać pratakoł ab pravaparušeńni na padstavie art. 23.34 KoAP (parušeńnie paradku arhanizacyi ci praviadzieńnia masavaha mierapryjemstva).
Astatnija ŭdzielniki akcyi, u tym liku Artur Žuk, stali aburacca dziejańniami pravaachoŭnikaŭ. Svajoj aburanaściu lidčanin pryciahnuŭ uvahu žurnalistaŭ.
Žuk z sumnieńniem vykazaŭsia nakont praŭdzivaści vynikaŭ vybaraŭ, zajaviŭšy pra nieabchodnaść pravieści adkrytuju vybarčuju kampaniju, zaklikaŭ biełarusaŭ bolš aktyŭna adstojvać svaje pravy, zmahacca za svaju budučyniu. Prezidentam Biełarusi, pavodle jaho mierkavańnia, pavinien byŭ stać «psichołah i biźniesmien».
Małady čałaviek byŭ nastolki ŭzrušany, što ŭ hutarcy z presaj raz-poraz zryvaŭsia na nienarmatyŭnuju leksiku, zrešty, tut ža vykazvaŭ svaje prabačeńni. Lidčanin skazaŭ žurnalistam, što jon razumieje nastupstvy svajho emacyjanalnaha vystupleńnia, jakija, «chutčej za ŭsio, buduć sumnyja».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary