Dyrektar škoły na prośbu prakamientavać datyčnaść da vybarnaj «karusieli» vyrvaŭ u žurnalistki telefon VIDEA

Dyrektar 21-j škoły Michaił Savicki admoviŭsia adkazvać žurnalistam na pytańni pra svaju mahčymuju datyčnaść da vybarnaj «karuseli».

Zdymak Michaiła Savickaha źmiaściŭ na sajcie partyi AHP naziralnik Mikałaj Kazłoŭ. Naziralnik źniaŭ troch čałaviek, jakija sprabavali prahałasavać na 24-m učastku ŭ 188-j škole daterminova 8 kastryčnika, ale ŭciakli z učastku. Jak paźniej vyśvietliłasia, siarod ich byŭ i dyrektar škoły Michaił Savicki.

Voś što apavioŭ Mikałaj Kazłoŭ pra toje, čamu jon paličyŭ hetych ludziej «karuselščykami»:

«Jany ŭžo nazvalisia kamisii, chacieli atrymać na ruki biuleteni, ale im niechta padaŭ znak, i jany syšli z učastku, tak i nie prahałasavaŭšy. Ja pajšoŭ za imi i na vulicy ich spytaŭ, chto jany i čamu pryjšli hałasavać siudy. Savicki skazaŭ, što jany tut nabyli kvateru i pierabłytali ŭčastak, ale siabie nie nazvaŭ i dakumentaŭ nie pakazaŭ. Pra inšych ludziej sa svajoj hrupy skazaŭ, što jany adna siamja. Potym my vykłali ich videa na sajcie, i ludzi nam napisali, što heta dyrektar 21-j škoły Michaił Savicki, a dźvie žančyny ź im — nastaŭnicy hetaj ža škoły. Cikava, što na toj momant na sajcie škoły fatahrafii hetych ludziej byli ŭžo vydalenyja. Ale ciapier my viedajem dakładna, što Michaił Savicki braŭ u hetym udzieł», — skazaŭ Mikałaj Kazłoŭ.

Pavialičyć

Što skaža Michaił Savicki na hetyja padazreńni naziralnika?

15 kastryčnika naziralnik razam z žurnalistami sprabavaŭ sustrecca ź Michaiłam Savickim u 21-j škole, ale dyrektar admoviŭsia adkazvać na pytańni žurnalistaŭ i zapatrabavaŭ pakinuć budynak, papiaredziŭšy, što siudy vyklikali milicyju. «Da pabačeńnia, ja vas siudy nie zaprašaŭ. Pakińcie škołu», — skazaŭ Michaił Savicki.

Škoła № 21 znachodzicca zusim pobač z 188-j specyjalizavanaj škołaj, dzie naziralnikam byŭ Mikałaj Kazłoŭ. Jak jon miarkuje, niekatoryja nastaŭniki 21-j škoły «dapamahali» rabić jaŭku papiaredniaha hałasavańnia na vybarčym učastku ŭ 188-j škole, «bo tyja mahli dapamahać im». 10 kastryčnika, kali Mikałaj Kazłoŭ sprabavaŭ źniać na videa čarhovych «karuselščykaŭ», jakija prahałasavali na jahonym učastku i atrymali hrošy, tyja napali na naziralnika, udaryli jaho pa nahach i sprabavali adabrać noŭtbuk. Mikałaj Kazłoŭ źviarnuŭsia ŭ milicyju z zajavaj ab zaviadzieńni kryminalnaj spravy, viadziecca pravierka jahonaj zajavy.

Pavodle naziralnikaŭ ad AHP Mikałaja Kazłova i Śviatłany Jakšynaj, u vynikovym pratakole daterminovaha hałasavańnia na 24-m učastku ŭ 188-j škole paznačana, što tut prahałasavała na 200 vybarcaŭ bolš, čym zafiksavali naziralniki.

Jak usio pačynałasia. Mikałaj Kazłoŭ idzie za mierkavanymi «karuselščykami»:

• 0
• 0
• 0
• 0
• 0
• 0
• 0
• 0