Udzielnikaŭ akcyjaŭ u Minsku, što prajšli 10 i 11 kastryčnika, masava vyklikajuć u milicyju
Fota z akcyi 10 kastryčnika Siarhieja Hudzilina
Staršynia AHP Anatol Labiedźka i były kandydat u prezidenty na vybarach 2010 hoda Uładzimir Niaklajeŭ atrymali pozvy ŭ milicyju ŭ suviazi ź ich udziełam u šeści nacyjanalnaha ściaha, jakoje prajšło 10 kastryčnika ŭ Minsku.
«U milicyju ja nie chadziŭ, razmaŭlaŭ ź imi pa telefonie, kali jany prapanavali pryjści. Skazaŭ, što jany tam sami dobra viedajuć, jak im pracavać, i bieź mianie. Jany adkazali, što — tak, dobra viedajuć. To bok na mianie składzieny pratakoł za 10 kastryčnika i buduć dasyłać pozvu ŭ sud, ale dzień suda, jak ja razumieju, jašče nie pryznačany. Karaciej, praces idzie», — paviedamiŭ Uładzimir Niaklajeŭ.
Anatol Labiedźka atrymaŭ paviedamleńnie, što budzie vyklikany ŭ sud pavodle pratakoła za ŭdzieł u šeści nacyjanalnaha ściaha. Dzień suda nie pryznačany. Taksama Anatol Labiedźka rychtujecca da razhladu svajoj skarhi na administracyjny prysud za akcyju 30 vieraśnia. Skarha budzie razhledžanaja 22 kastryčnika ŭ minskim haradskim sudzie.
Tym časam u milicyju vyklikajuć udzielnikaŭ akcyi 11 kastryčnika na płoščy Niezaležnaści, nieŭzabavie paśla zakančeńnia vybaraŭ. Aktyvist Leanid Kułakoŭ paviedamiŭ, što jaho z adnadumcami vyklikajuć 19 kastryčnika na 14.00 u Centralny RUUS.
«Viedaju, što taksama vyklikali Alesia Makajeva, Mikałaja Kołasa, Alesia Rybačenku, Maryju Kaśjan i Volhu Mikałajčyk. Šukajuć, kab uručyć pozvu, Maksima Viniarskaha. Usich — za akcyju na płoščy. Pojdziem u milicyju razam z advakatam», — skazaŭ Leanid Kułakoŭ.
U piatnicu 16 kastryčnika za ŭdzieł u akcyi na płoščy Niezaležnaści byŭ aštrafavany na 720 tysiač rubloŭ Artur Žuk. Maładoha čałavieka abvinavacili ŭ brydkasłoŭi ŭ publičnym miescy.
Taksama za ŭdzieł u akcyi na Kastryčnickaj płoščy byŭ składzieny pratakoł na viadomaha litaratara Adama Hłobusa.
«Pozvy ŭ sud na dakładny čas jašče nie atrymaŭ, ale papiaredzili, kab čakaŭ», — skazaŭ Adam Hłobus.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary