Dziakujučy žorstka adbudavanaj viertykalnaj sistemie achovy zdaroŭja Biełarusi ŭdałosia dasiahnuć peŭnych pośpiechaŭ, zajaviŭ Alaksandr Łukašenka na sustrečy z dyrektaram Jeŭrapiejskaha rehijanalnaha biuro Suśvietnaj arhanizacyi achovy zdaroŭja (SAAZ) Žužanaj Jakab 21 kastryčnika ŭ Minsku.
Siońnia ŭ Minsku prachodzić Jeŭrapiejskaja ministerskaja kanfierencyja pa pytańniach umacavańnia zdaroŭja na ŭsich etapach žyćcia ŭ kantekście palityki «Zdaroŭje-2020» — maštabnaha płana dziejańniaŭ SAAZ na najbližejšyja piać hadoŭ.
Pavodle słoŭ Łukašenki, u Biełarusi zabiaśpiečany «praktyčna roŭny dostup nasielnictva da abjektaŭ achovy zdaroŭja», tamu ŭ adroźnieńnie ad niekatorych dziaržaŭ tut nie byvaje takoha, što «pad płotam pamiraje čałaviek, kali ŭ jaho niama strachoŭki». «Hetaha ŭ nas niama, my zaŭsiody lečym adnolkava ŭsich ludziej», — cytuje kiraŭnika dziaržavy jaho pres-słužba.
U Biełarusi pa pravie hanaracca svaimi dasiahnieńniami ŭ achovie zdaroŭja, zajaviŭ jon. Tak, pakazčyki maciarynskaj śmiarotnaści, naradžalnaści, hibieli dziaciej znachodziacca pad kantrolem urada. Sioleta, pavodle słoŭ Łukašenki, u Biełarusi nie zarehistravana nivodnaha vypadku maciarynskaj śmiarotnaści, u 2014-m byŭ zarehistravany adzin, ale tady žančynu nie ŭdałosia vyratavać z-za abjektyŭnych pryčyn. «Hetaha niaprosta było dasiahnuć. I pa hetych pakazčykach my znachodzimsia u trojcy lidaraŭ u śviecie pobač ź viadučymi raźvitymi dziaržavami», — skazaŭ jon.
Jašče adnym dasiahnieńniem Łukašenka nazvaŭ poŭnuju madernizacyju achovy zdaroŭja. «My asnaścili našych uračoŭ samaj sučasnaj technikaj», — dadaŭ jon.
Pry hetym Łukašenka pryznaŭ, što taki padychod da achovy zdaroŭja «niekalki razbeściŭ biełarusaŭ», jon nie sadziejničaje tamu, kab čałaviek sam kłapaciŭsia pra svajo zdaroŭje. «Usio biaspłatna, dziaržava nosić na rukach kožnaha čałavieka», — zajaviŭ Łukašenka. Jon adznačyŭ, što nieadnarazova havaryŭ pra nieabchodnaść kožnamu kłapacicca ab svaim zdaroŭi, bo dla dziaržavy heta doraha, da taho ž jana abjektyŭna nie zmoža zrabić usio patrebnaje za čałavieka.
Łukašenka vykazaŭ upeŭnienaść u tym, što Žužana Jakab i jaje kalehi nie darma naviedvajuć Biełaruś. Jon padziakavaŭ za inicyjatyvy SAAZ i daŭ vysokuju acenku prahramie «Achova zdaroŭja-2020», zapeŭniŭšy, što Biełaruś źjaŭlajecca jaje prychilnikam na ŭsie 100%.
U svaju čarhu Žužana Jakab vykazała Alaksandru Łukašenku padziaku «za lidarstva, namahańni, skiravanyja na ŭdaskanalvańnie sistemy achovy zdaroŭja, jakija ŭžo prynieśli vidavočny vynik». «Dla SAAZ palityčny składnik maje vialikaje značeńnie, i my ŭpeŭnienyja, što Biełaruś zrabiła pravilny palityčny vybar, inviestavaŭšy ŭ śfieru achovy zdaroŭja. Heta vielmi pravilnaje rašeńnie», — cytuje Jakab pres-słužba prezidenta.
Kamientary