U niadzielu 25 kastryčnika svoj 65-hadovy jubilej adznačała hazeta biełaruskaj dyjaspary ŭ Amerycy — «Biełarus». Pieršy numar hazety vyjšaŭ u Ńju-Jorku 20 vieraśnia 1950 hodu. Załažyła vydańnie stvoranaje pavajennaj emihracyjaj ŭ 1949 hodzie Biełaruska-Amerykanskaje Zadzinočańnie (BAZA).
Hazeta całkam vydajecca na achviaravańni svaich čytačoŭ i rychtujecca redakcyjnymi kalektyvami ciaham usich hetych hadoŭ na hramadzkich pačatkach. Da siońniašniaha času u śviet vyjšła 616 numaroŭ.
«Biełarus» — adno z najstarejšych pieryjadyčnych biełaruskich vydańniaŭ u zamiežžy. Možna skazać, što heta siońnia amal adzinaja emihracyjnaja hazeta, jakaja ŭtrymałasia taki doŭhi čas. «Biełarus» adlustroŭvaje nie tolki žyćcio amerykanskich biełarusaŭ, ale i padaje infarmacyi pra biełaruskija asiarodki ŭ roznych inšych krainach, a taksama i pra naviny z Baćkaŭščyny. Ad pačatku i da siońnia hazeta trymajecca ŭ svaim źmieście patryjatyčnych pohladaŭ, padtrymlivaje ideju dziaržaŭnaj niezaležnaści Biełarusi, idei demakratyi i svabody, prapahandy i abarony biełaruskaj kultury i movy.
Jubilejnaja impreza adbyłasia u Biełaruskim centry na Atlantyk Aveniu 401 u Ńju-Jorku. Hanarovym hościem i asnoŭnym pramoŭcam byŭ sp. Vitaŭt Kipiel.
Šmat hadoŭ jon supracoŭničaŭ z hazetaju i ŭkładaŭ svaju pracu ŭ jaje vydańnie razam sa svajoj žonkaju Zoraju i blizkimi palečnikami. Sp. Kipiel začytaŭ pryvitalny list ad sp. Janki Zaprudnika, jaki ciaham 15 hadoŭ byŭ hałoŭnym redaktaram, ale ŭ hety dzień nie zdoleŭ pryjści na jubilej. Ad imia cełaj svajoj addanaj biełaruskaj spravie vialikaj siamji sp. Vitaŭt zrabiŭ sapraŭdy «carski» padarunak hazecie — achviaravańnie na 1 tys. dał.
Sučasny hałoŭny redaktar hazety sp. Hanna Surmač začytała atrymanyja vinšavańni ź jubilejem — ad sp. Ivonki Surviłły — staršyni Rady BNR, ad Zhurtavańnia biełarusaŭ śvietu «Baćkaŭščyna», ad Zhurtavańnia biełarusaŭ Kanady i Parafii Śv. Kiryły Turaŭskaha z Taronta, ad sp. Valery Bartaša ź Sievastopala. Jana taksama zhadała historyju vydańnia, kožnaha ź jahonych papiarednich hałoŭnych redaktaraŭ, prademanstravała pieršy numar hazety i zaprasiła prysutnych aznajomicca z padrychtavanaj u zali vystavaj.
Siabra Redakcyi sp. Taćciana Krasoŭskaja raspaviała, jak danosicca hazeta da čytačoŭ, kudy idzie rassyłka, začytała niekatoryja atrymanyja listy sa słovami padziaki. Siabra Redakcyi, jaki ažyćciaŭlaje kamputarny nabor numaroŭ hazety, sp. Mikoła Šydłoŭski zaklikaŭ prysutnych bolš aktyŭna supracoŭničać z hazetaju, padavać svaje infarmacyi, kab źmiest hazety staŭ bolš šyrokim.
Raścisłaŭ Haroška, jak adzin sa starejšych čytačoŭ hazety, pažadaŭ vydańniu pośpiechaŭ, kab jano praciahvała žyć u budučyni.
Impreza skončyłasia ŭspaminami pra roznyja admietnyja momanty ŭ žyćci hazety, śmiešnyja vypadki. Tak, sp. Haroška nahadaŭ, jak žonka adnaho z byłych redaktaraŭ hazety ciaham 20 hadoŭ sp. Stanisłava Stankieviča prasiła siabroŭ na niejkim schodzie BAZA:»Nie adbirajcie ŭ jaho hazetu, bo jon pamre». Dziakujučy takim voś entuzijastam i dažyŭ «Biełarus» da hetaha pavažnaha 65-hadovaha vieku.
