BFF abaraniaje zaŭziataraŭ z «Pahoniaj», Rumas sustreniecca z Šunievičam
Uzajemaadnosiny futbolnych zaŭziataraŭ i milicyi buduć abmiarkoŭvacca na sustrečy staršyni Biełaruskaj fiederacyi futboła Siarhieja Rumasa i ministra ŭnutranych spraŭ Ihara Šunieviča, paviedamiŭ na sustrečy z žurnalistami 28 kastryčnika pieršy namieśnik staršyni BFF Siarhiej Safarjan.
Padstava dla sustrečy — incydent na adboračnym matčy čempijanatu Jeŭropy 2016 hoda Biełaruś — Makiedonija, jaki adbyŭsia 12 kastryčnika na «Barysaŭ-Arenie». U pierapynku byli zatrymany i dastaŭleny ŭ Barysaŭski RAUS try zaŭziatary. Na nastupny dzień jany byli aštrafavany na 10 bazavych vieličyń (1,8 młn rubloŭ) kožny. Pavodle słoŭ zaŭziataraŭ, pravaachoŭniki pryčapilisia da šalikaŭ z vyjavaj histaryčnaha hierba «Pahonia», siłaviki śćviardžali, što fanaty znachodzilisia ŭ niećviarozym stanie i admaŭlalisia vykonvać ich zakonnyja patrabavańni. Paźniej kiraŭnik MUS Šunievič zajaviŭ, što našeńnie simvoliki z hierbam «Pahonia» nie źjaŭlajecca padstavaj dla pryciahnieńnia da adkaznaści. Fiederacyja futboła zajaviła, što biare incydent na kantrol.
«Uziaćcie na kantrol nie padrazumiavaje, što my možam paŭpłyvać na hetuju situacyju», — zajaviŭ Safarjan i pradoŭžyŭ: «My hetuju situacyju trymajem na kantroli, i [śpiecyjalist pa pracy z zaŭziatarami] Ihar [Bialkovič] niepasredna adkazvaje za toje, kab u nas hetaja infarmacyja była pastajanna, pierš za ŭsio z boku zaŭziataraŭ, tamu što MUS nie vielmi nam daje infarmacyju. My atrymlivajem jaje tolki z aficyjnych zajaŭ».
«Byŭ list u naš adras, piersanalna, ale tam nie infarmacyja pa sutnaści, a, uvohule, niezadavalnieńnie našymi dziejańniami, što my nie padtrymlivajem dziejańni MUS, i paŭtorana, što zaŭziatary byli niećviarozyja i parušali hramadski paradak. U hetym vypadku ŭźnikaje pytańnie, jak niećviarozyja praz kardony milicyi trapili na stadyjon, chto ich tudy prapuściŭ», — adznačyŭ pradstaŭnik BFF.
U hetaj situacyi, pavodle jaho słoŭ, pakul staić šmatkropje. «Nakolki my viedajem, hetaje rašeńnie budzie abskardžvacca», — paviedamiŭ Safarjan.
Pavodle jaho słoŭ, u fiederacyi jość prapanova, «jakuju MUS pakul nie pačuła i nie choča čuć». «Siarhiej Mikałajevič Rumas ciapier znachodzicca ŭ adpačynku i adrazu paśla viartańnia budzie sustrakacca ź ministram. Pakolki nas nie chacieli vysłuchać u rabočym paradku, jon (Rumas) skazaŭ, što budzie sam vychodzić na sustreču ź ministram i prapanoŭvać jamu našaje bačańnie, jak nadalej paźbiahać takich situacyj», — skazaŭ pieršy namieśnik staršyni BFF.
«My nie zacikaŭleny ŭ tym, kab suprać zaŭziataraŭ ažyćciaŭlalisia niejkija nieadekvatnyja abo niezasłužanyja dziejańni, — padkreśliŭ jon. — Ź inšaha boku, my nie padtrymlivajem tuju častku zaŭziataraŭ, jakija, znachodziačysia na futbolnych matčach, parušajuć hramadski paradak».
Safarjan nahadaŭ ab letašnim adboračnym matčy Jeŭra-2016 Biełaruś — Ukraina, kali fanaty abiedźviuch zbornych praśpiavali viadomuju maciernuju prypieŭku pra prezidenta Rasii Uładzimira Pucina. «Ja nie pamiataju, kab tam kahości brali, masava vyvodzili, chacia tam niekalki socień možna było vyvieści ź siektara za ŭžyvańnie niecenzurnaj łajanki, i, napeŭna, u sudzie nie ŭźnikła b pytańniaŭ, za što ich vydvaryli. Ale, nakolki ja pamiataju, tady nivodnaha sudovaha razboru nie było. Voś takaja niepaśladoŭnaść u dziejańniach vyklikaje pytańni, i my prapanoŭvajem stvaryć miechanizm, kab nadalej takich incydentaŭ nie ŭźnikała, kab abodva baki viedali, što jość niejki treci bok, jaki budzie aceńvać hetuju situacyju abjektyŭna, nie addajučy pryjarytetu tamu ci inšamu boku. Buduć davać pakazańni nie pradstaŭniki AMAP u sudzie, a ludzi, jakija nie zacikaŭleny zajmać čyjści bok», — zajaviŭ Safarjan.
«Da tych por, pakul takija situacyi ŭ pryncypie mahčymaja, zaŭziataraŭ na stadyjonach budzie mienš, a staŭleńnie da milicyi nie palepšycca, — pierakanany pradstaŭnik fiederacyi. — Dva hetyja pytańni treba vyrašać: pavialičvać kolkaść zaŭziataraŭ na trybunach i palapšać staŭleńnie milicyi da našych zaŭziataraŭ. Jany nie złačyncy».
Kamientary