KDB zatrymaŭ arhanizataraŭ hrupy, jakija zajmalisia prasłuchoŭvańniem bolš čym dvuch tysiač biełarusaŭ — pradstaŭnikoŭ ułady, biznesu i ŚMI. Pra heta paviedamlaje pres-słužba viedamstva. Maštab i abjekty prasłuški dazvalajuć vyłučyć hipotezu pra mahčymaść elemientaŭ zamiežnaha špijanažu ŭ hetaj spravie. Abo pra niejkuju hulniu, jakuju pakul ciažka zrazumieć, ci fejk.
Prasłuchoŭvalisia nie tolki pamiaškańni, ale i telefonnyja pieramovy. Taksama ŭdzielniki hrupy zajmalisia uzłomam elektronnaj pošty, akaŭntaŭ Skype, Viber, WhatsApp, sacyjalnych sietak.
«Apłata pasłuh ažyćciaŭlałasia praz zakanśpiravanuju schiemu pieravodaŭ hrašovych srodkaŭ z vykarystańniem elektronnych kašalkoŭ», — raspaviali ŭ KDB.
U viedamstvie adznačyli, što prasłuchoŭvalisia bolš čym dźvie tysiačy biełarusaŭ: u ich liku — namieśnik načalnika adnaho z RUUS Minska, pradstaŭnik kiraŭnictva Hrodzienskaha abłasnoha ŭpraŭleńnia MNS, supracoŭniki Śledčaha kamiteta, žurnalisty dziaržaŭnych i niedziaržaŭnych ŚMI, pradstaŭniki mytnych orhanaŭ, vajskoŭcy, a taksama kiraŭniki i pradstaŭniki orhanaŭ ułady i kiravańnia, dziaržaŭnych i pryvatnych pradpryjemstvaŭ.
U vyniku praviedzienych mierapryjemstvaŭ zatrymanyja arhanizatary złačynnaj dziejnaści. Praviedziena bolš za 80 pieratrusaŭ. Viadomyja kala paŭtary tysiačy zakazčykaŭ niezakonnych pasłuh. Vyjaŭlena i kanfiskavana śpiecyjalnaje elektronnaje abstalavańnie, najaŭnaja zamiežnaja valuta.
U dačynieńni da ŭdzielnikaŭ złačynnaj hrupy raspačata kryminalnaja sprava pa prykmietach złačynstva, praduhledžanaha č.2 art. 376 KK Biełarusi (Niezakonnyja vyrab, nabyćcio abo zbyt srodkaŭ dla sakretnaha atrymańnia infarmacyi, učynienyja hrupaj asob pa papiaredniaj zmovie). Sankcyi pa hetym artykule praduhledžvajuć pakarańnie ŭ vyhladzie pazbaŭleńnia voli terminam da 4 hadoŭ.
U viedamstvie taksama raźbirajucca ź dziejańniami zakazčykaŭ niezakonnych pasłuh. Pa acency śledstva, u ich uhledžvajucca prykmiety składu złačynstva, praduhledžanaha art. 203 KK Biełarusi (Parušeńnie tajamnicy pierapiski, telefonnych ci inšych pieramovaŭ, paštovych, telehrafnych ci inšych paviedamleńniaŭ). U ciapierašni čas pa ŭkazanym artykule ŭ dačynieńni da zakazčykaŭ supraćpraŭnych dziejańniaŭ raspačata bolš za 20 kryminalnych spraŭ.
Da zatrymanych prymieniena miera strymańnia ŭ vyhladzie zaklučeńnia pad vartu, paviedamlaje KDB.
Śpis abjektaŭ dla prasłuchoŭvańnia — supracoŭniki dziaržorhanaŭ, siłaviki, dziaržaŭnyja i niedziaržaŭnyja žurnalisty — navodzić na dumku pra mahčymy śled zamiežnaj raźviedki ŭ hetaj spravie. Bo kali b havorka išła pra zvyčajnuju firmu, to chto moh by być jaje klijentami? Žonka — na muža, partnior pa biznesie — na partniora.
Ale ŭ toj ža čas KDB zajaviŭ pra 1500 zamoŭcaŭ. U takim razie, reč moža być u špijanažy pad prykryćciom biznesu. Abo pra niejkuju bolš składanuju hulniu śpiecsłužbaŭ ci fejk.
Čym siońnia zajmajucca niekali viadomyja hieroi ŽŽ? Spojler: mnohija tak i nie zakinuli błohierstva1
Kamientary