Kamandujučy suchaputnymi siłami ZŠA ŭ Jeŭropie, hienierał-lejtenant Ben Chodžes papiaredžvaje, što rasijskija vajskovyja mahutnaści ŭ Kalininhradskaj vobłaści i tak zvany Suvalski kalidor u Polščy mohuć pieraškadžać abaranazdolnaści Bałtyjskich krain.
U kancy minułaha tydnia na sustrečy z amierykanskimi vajskoŭcami ŭ Litvie B.Chodžes zajaviŭ, što ŭ Kalininhradskaj vobłaści dysłakavanyja dźvie bryhady suchaputnych sił RF, adna bryhada VMF, dźvie bazy VPS i častka Bałtyjskaha fłota.
«U Kalininhradskaj vobłaści zaraz jość mahčymaść nie dazvolić našamu vajskovamu fłotu i nijakamu fłotu NATA trapić u Bałtyjskaje mora, — skazaŭ B. Chodžes. — Z Kalininhradskaj vobłaści jany mohuć spynić luboha, chto pasprabuje trapić u Bałtyjskaje mora. A ŭ nas tut try sajuźniki — Łatvija, Litva i Estonija».
Amierykanski aficer dadaŭ, što mahčymaść Rasii błakavać vychad u Bałtyjskaje mora źjaŭlajecca «surjoznaj pahrozaj dla našych sajuźnikaŭ i siabroŭ».
Chodžes taksama raspavioŭ amierykancam pra terytoryju na paŭnočnym uschodzie Polščy, jakaja miažuje na poŭnačy z Kalininhradskaj vobłaściu, a na ŭschodzie — ź Biełaruśsiu. «Hetuju zonu my nazyvajem Suvałkski prałom», — skazaŭ kamandujučy suchaputnymi siłami ZŠA ŭ Jeŭropie.
«Za vielmi karotki čas [biełaruskija i rasijskija vajskoŭcy] mohuć złučycca i zabłakavać litoŭska-polskuju miažu. I izalavać tym samym troch sajuźnikaŭ NATA ad Aljansu», — skazaŭ B. Chodžes.
Mienavita tamu, jak jon śćviardžaje, ZŠA i ŭvieś NATA pavinien strymlivać Rasiju ad napadu na Bałtyjskija krainy. «Vyzvaleńnie našych sajuźnikaŭ kaštuje daražej, čym strymlivańnie», — akcentavaŭ hienierał.
Ciapier čytajuć
Čamu ŭłady maŭčać pra pryčyny razbureńnia doma ŭ Homieli i jakija jość viersii2
Kamientary