ZŠA raźmieściać u Polščy kala 600 adzinak ciažkaj vajennaj techniki
Kamandujučy siłami ZŠA ŭ Jeŭropie hienierał Ben Chodžes, jaki znachodzicca ź vizitam u Varšavie, paćvierdziŭ, što ZŠA majuć namier adpravić va Uschodniuju Jeŭropu 1200 adzinak ciažkaj vajennaj techniki, raźličanych na adnu bryhadu sałdat.
Kala 600 adzinak techniki buduć raźmieščany na bazach u Polščy. Inšaja pałova — u krainach Bałtyi, a taksama ŭ Rumynii i Vienhryi.
Hienierał adznačyŭ, što siarod 1200 adzinak techniki buduć 240 tankaŭ, a taksama bajavyja mašyny piachoty i artyleryjskija pryłady.
8 kastryčnika ŭ Brusieli Polšča i ZŠA padpisali pahadnieńnie, jakoje vyznačaje raźmiaščeńnie składoŭ amierykanskaj vajennaj techniki na terytoryi Polščy. Pahadnieńnie stała vynikam pieramovaŭ pamiž polskim i amierykanskim uradami. Polski bok pradstaviŭ dla vykarystańnia terytoryju i abjekty, jakija naležać Avijacyjnaj bazie ŭ Łasku, Centru navučańnia suchaputnych vojskaŭ u Draŭska-Pamorskim, vajennym kompleksach ŭ Skviežynie, Cechanavie i Choščnie.
Raniej ministr abarony Polščy Tomaš Siemoniak zajaŭlaŭ, što składy ciažkaha ŭzbrajeńnia amierykanskaj armii źjaviacca ŭ Polščy ŭ siaredzinie 2016 hoda. Polski bok choča abjadnać hetuju inicyjatyvu z udziełam amierykanskich vajskoŭcaŭ u vučeńniach «Anakonda». Skarystanaja padčas vučeńniaŭ technika, mahčyma, zastaniecca ŭ Polščy.
Ciapier čytajuć
Što Babaryka i Kaleśnikava adkazali na pytańni pra vajnu111
Kamientary