 Fota web-friend.com |
Pavodle BT, pad kiraŭnictvam ataše pasolstva sp. Kurta Finli była arhanizavanaja hrupa vyjaŭleńnia i znachodžańnia, metaj jakoj byŭ «zbor i pieradača amerykanskamu boku pa zadańni FBR źviestak dla vykarystańnia ich dla naniasieńnia strataŭ Biełarusi». Finli nieadnarazova padčas repartažu nazyvaŭsia ahientam FBR.
U hrupu stvoranuju pry pasolstvie ZŠA ŭvachodzili dziesiać čałaviek, pryčym usie jany byli hramadzianami Biełarusi. Padčas pieradačy byli pakazanyja tvary ŭdzielnikaŭ «špijonskaj arhanizacyi», ale nie nazyvalisia ichnyja proźviščy. Byli pakazanyja kadry nibyta dopytaŭ zatrymanych, jakija najchutčej vialisia skrytaj kameraj. Pa słovach žurnalista, hrupa była zabiaśpiečanaja fotaaparatami, binoklami, videakamerami i telefonami.
Udzielnikam hrupy stroha było zabaroniena naviedvać terytoryju amerykanskaha pasolstva, jany kantaktavali tolki niepasredna sa svaim kurataram Finli. Sustrečy adbyvalisia na kanśpiratyŭnaj kvatery, jakaja mieściłasia pa vulicy Kisialova za 500 metraŭ ad ambasady. Zatrymańnie adbyłosia 13 sakavika, kali miełasia adbycca čarhovaja sustreča. U repartažy kazałasia, što na śled «špijonaŭ» atrymałasia vyjści, dziakujučy navodcy žycharoŭ hetaha domu. Jany zapadozryli, što kvateru adnačasova naviedvajuć kala dziesiatka nieznajomych mužčyn. Žychary domu pačali padazravać, što tam moh znachodzicca narkapryton. Hrupa była zatrymanaja amal u poŭnym składzie. Źjaviŭsia ŭ kvatery i Finli. BT źviarnuła ŭvahu, što amerykanski dyplamat uvieś čas łajaŭsia i patrabavaŭ ad milicyjantaŭ pakinuć pamiaškańnie i pradstavić dakumenty.
Razam z tym, žurnalist Pieršaha nacyjanalnaha telekanału nie paviedamiŭ, ci aryštavanyja «špijony» i Finli, a taksama, ci apošni byŭ departavany z krainy. Jašče byli pakazanyja śviedčańni hramadzian Biełarusi, jakich «dapytvali» «amerykanskija špijony».
Darečy, u vinu Finli było pastaŭlena pastajannaje naviedvańnie mitynhaŭ apazycyi i byli pakazanyja kadry z Eŭrapiejskaha maršu, kali dyplamat fatahrafavaŭ supracoŭnikaŭ milicyi.
Naprykancy repartažu było paviedamlena, što amerykanskaje pasolstva časova prypyniła vydaču vizaŭ biełaruskim hramadzianam. Žurnalist ź ironijaj pryvioŭ cytatu z aficyjnaha sajtu ambasady: «Razhlad vizavych zajavaŭ časovy prypynieny, bo našy resursy skiravanyja na inšyja pryjarytety».
U pasolstvie ZŠA praź Vialikdzień paniadziełak źjaŭlajecca vychodnym dniom, tamu nijakich kamentaroŭ tam nie dajuć. Čakajecca, što niejkija zajavy mohuć być tolki ŭ aŭtorak. Admaŭlajecca ad kamentaroŭ i pres-słužba KDB.
Palitolah Vital Silicki zaŭvažaje, što akurat paru dzion tamu «Hazprom» zusim minimalna pavysiŭ ceny na haz dla biełarusaŭ. Silicki ličyć heta ŭzajemaźviazanymi padziejami: «Biełaruskija ŭłady stvarajuć takoje stanovišča, pry jakim Maskva nia moža kanfliktavać z Łukašenkam, bo jon taki antyamerykanski».
Vital Silicki dadaŭ:
Cikavy momant, FBR nie pracuje za miežami ZŠA, dla hetaha isnuje CRU. Takim čynam, infarmacyju padadzienuju na BT možna ličyć poŭnaj biazhłuździcaj.
Skandał sa špijonami nia pieršy skandalny vitok u biełaruska‑amerykanskich dyplamatyčnych dačynieńniaŭ. 7 sakavika z Vašynhtonu ŭ Miensk byŭ adklikany pasoł Biełarusi Michaił Chvastoŭ. Takim čynam, biełaruskija ŭłady vykazali svaju niazhodu z ekanamičnymi sankcyjami suprać «Biełnachtachimu».
12 sakavika paśla nastojlivych rekamendacyj z boku MZS Biełarusi ź Miensku źjechała pasoł ZŠA Karen Stjuart. Ciapier źniešniepalityčnaje viedamstva nastojvaje na źmianšeńni štatu supracoŭnikaŭ amerykanskaha pasolstva.
