Žanr: tryler
Režysior: Ełaj Rot
U rolach: Kijanu Ryŭz, Łarenca Iza, Ana die Armas, Aaran Barns, Ihnasija Ałamand, Den Bejli, Miehan Bejli, Kolin Kemp
Čyli, ZŠA, 100 chv.
Adznaka: 5
Adpraviŭšy siamju na plažny adpačynak, architektar Evan zastajecca na ŭik-end doma adzin, kab darabić terminovy prajekt. Unačy ŭ jaho dźviery hrukajucca dźvie miłyja dziaŭčyny, jakija zabłukali ŭ nieznajomym rajonie i naskroź pramokli.
Evan akazvaje im patrebnuju dapamohu, ale dziaŭčaty nie chočuć tak prosta pakidać jaho dom. Pastupova ŭsio pavaročvajecca ŭ bok ździekaŭ, vytančanych katavańniaŭ i pavolnaha sadysckaha źniščeńnia siamiejnaha žyćcia Evana.
Režysior i akcior Ełaj Rot («Zialonaje piekła» (2013), druhi režysior «Biassłaŭnych vyradkaŭ» (2009)), źniaŭ remejk na stužku 1977 hoda «Śmiarotnaja hulnia» (rež. Picier S.Tejnar, ZŠA). Film Rota taksama nahadvaje tvor niamieckaha režysiora Michaela Chaniekie «Zabaŭnyja hulni» (1997), dzie z cełaj siamji ździekujucca dva chłopcy. Ale kali film Chaniekie byŭ naminavany ŭ Kanach, to remejk tolki zamianiaje karcinku trešavaj dramy na bolš jakasnuju.
Vyklikaje pytańnie źjaŭleńnie ŭ takoj stužcy Kijanu Ryŭza, viadomaha ŭdziełam u jakasnych bajevikach pra roznyja epochi (tryłohija «Matryca» (1999, 2003), «47 roninaŭ» (2013), «Džon Uik» (2014)). Tut akcior pakazvaje dobruju ihru, ale ŭ davoli sprečnym siužecie.
U roli fatalnych dziaŭčat źnialisia žonka Rota, čylijka Łarenca Iza, i ŭzychodziačaja zorka Halivuda, kubinka Ana de Armas. Apošniaja razam z Ryŭzam u nastupnym hodzie źjavicca ŭ mistyčnaj stužcy «Dačka Boha».
Siužet trylera ad pačatku słaby.
Jamu nie chapaje hłybinnaj prablematyki: pretenzii dziaŭčat da dobraha siemjanina Evana vyhladajuć biespadstaŭnymi, a dla varjatak jany dziejničajuć nadzvyčaj arhanizavana. Asensavanaha zakančeńnia, jak i vyraznaj matyvacyi hieraiń, siužet nie maje, jon paprostu nikudy nie viadzie.
Kamientary