Fanat-antyfašyst: Nie treba źmiešvać Pahoniu z palitykaj. Maci źbitaha padletka: Zajavy nie pisali ni ja, ni syn

U sieradu 18 listapada milicyja apublikavała videa, na jakim fanat kalinkavickaha futbolnaha kłuba «Viertykal» źbivaje zaŭziatara «JUA-Bud-Žytkavičy».

«Kažy: «Ja adpisvajusia ad antyfašysckaha ruchu», — patrabuje kryŭdziciel. 

U dačynieńni da napadnika Jaŭhiena P. była raspačataja kryminalnaja sprava pa artykule «Chulihanstva». Ciapier junak znachodzicca ŭ homielskim SIZA. Skandalnaści spravie dadaŭ toj fakt, što Jaŭhien byŭ u majcy z «Pahoniaj».

«U kaho jašče jość pytańnie «Pryčym tut Pahonia?» — było napisana ŭ supravadžalnym tvicie ad imia milicyi.

Kab bolš daviedacca pra hetu historyju, Jeŭraradyjo źviazałasia ź siabrami padazravanaha, dyrektaram jaho navučalnaj ustanovy i paciarpiełym, jaki, akazvajecca, nie źviartaŭsia ŭ milicyju paśla incydentu. 

Toj samy 17-hadovy fanat Jaŭhien, jaki na videa źbivaje antyfašysta, navučajecca na budaŭnika ŭ adnoj z ustanoŭ Mazyra.

«Pa Ženi nijakich pytańniaŭ raniej nie ŭźnikała. Ni pa navučańni, ni pa naviedvańni, ni pa pavodzinach, — kanstatuje dyrektar vučelni. — Jaho maci — sacyjalny piedahoh u škole. Tamu kali ja pabačyŭ hety rolik, to spačatku pavieryć nie moh, što heta sapraŭdy Ženia».

«Jon nacysckich pohladaŭ nie prytrymlivajecca, — pierakonvaje Andrej, siabar padazravanaha pa fanackaj trybunie. — Ja raskažu vam, jak było. Bojka z tymi fanatami zaviazałasia nie tamu, što adny fašysty, a inšyja — antyfašysty, a tamu, što chłopcy z Žytkavičaŭ — vyskački. Jany zajmajucca durystykaj, vykabieńvajucca. Našy chłopcy prosta hulali pa horadzie, a hrupoŭka Žytkavičaŭ ich pačali pravakavać, abražać. Voś z čaho pačałosia. Tyja stali ŭ stojku, adrenalin, zaviazałasia bojka. Apanienty dali dzioru, a adzin ź ich zabieh u tupik. Ź im pačali razmaŭlać».

Pavialičyć

Jeŭraradyjo: Hutarka mnohich šakavała…

Siabar padazravanaha: Tam byŭ starejšy chłopiec, jaki pryjechaŭ u Žytkavičy na mašynie. Jon dyktavaŭ Ženiu, jakija pytańni treba zadavać.

Jeŭraradyjo: Čamu Jaŭhien vykarystoŭvaŭ Pahoniu?

Siabar padazravanaha: Tamu što heta staradaŭni hierb Biełarusi. A jon — za Biełaruś. Jon narmalny chłopiec, zajmaŭsia sportam, nie maje škodnych zvyčak.

Jeŭraradyjo: Jak tak atrymałasia, što videa trapiła ŭ internet?

Siabar padazravanaha: Adzin chłopiec heta zdymaŭ. Usim na telefonie pakazaŭ, a potym skazaŭ, što vydaliŭ. A ŭviečary jano źjaviłasia ŭ sacsietkach u paście «Pajezdka ŭ Žytkavičy». Jano pravisieła dvoje sutak. Aŭtaru ŭvieś čas kazali: «Vydali». Jon nie słuchaŭsia. A kali vydaliŭ, było ŭžo 3000 prahladaŭ. A praz tydzień prosta na ŭroki pryjechała milicyja i vyvieła Ženiu ŭ kajdankach.

Na videa padazravany vyhladaje vielmi pahroźliva. U jaho ŭłasnym fotaarchivie takoj ahresiŭnaści nie bačna. A voś nieanacyskija simvały na staroncy ŭ Jaŭhiena znachodzim. Pa susiedstvu z Pahoniaj heta vyhladaje žachliva.

Što praŭda, prajavy nieanacyzmu z boku fanataŭ na stadyjonie zaŭvažanyja nie byli, kaža viadomy zaŭziatar FK «Viertykal» Vasil Paŭłoŭski, jaki dapamahaje kłubu ŭ arhanizacyjnych pytańniach.

«Uvohule z fanatami nie maju ničoha supolnaha. Vychodzić, jany tak lubiać kłub, raz takim čynam vykarystoŭvajuć jaho imia, — aburajecca Paŭłoŭski. —Što jany prapahandujuć, nie ŭjaŭlaju. Mahčyma, dla ich heta prosta zabava, a dla mianie kłub — sens žyćcia. «Viertykali» heta situacyja vielmi naškodziła. Znajšoŭ sponsaraŭ — i z-za hetaha skandału jany ad nas adviarnulisia».

Pavialičyć

Jeŭraradyjo źviazałasia z 16-hadovym Viktaram, jakoha biŭ padazravany. Trubku pierachoplivaje maci paciarpiełaha. Jana aburanaja tym, što MUS vystaviła incydent na pakaz:

«U mianie telefon čyrvony, mnie siońnia ŭsie znajomyja telefanujuć. Zajavu nie pisała ni ja, ni Vicia. Ale ŭ vyniku tłumačeńni daviałosia davać ciaham čatyroch hadzin. Toj, chto biŭ, zajmajecca baraćboj. U ich tam spartovyja pryncypy, vahavyja katehoryi. Ale jany suprać usich praviłaŭ napali na syna. Dobra, što ŭsio abyšłosia, usie my pad Boham chodzim. Usie znajomyja ŭ šoku ad hetaha videa. Prosta ŭrod. Pa-inšamu jaho nie nazavieš».

Fanat-antyfašyst: «Pahonia — heta ahulny trend, jaki nielha źmiešvać z palitykaj. Simvał vykarystoŭvajuć usie»

Jašče niekalki hadoŭ tamu fanaty-antyfašysty byli adnoj z najmacniejšych kalafutbolnych hrupovak Biełarusi. Ale paśla razvału kłuba «Partyzan» ruch raźvivacca pierastaŭ. Adzin z aŭtarytetnych fanataŭ-antyfašystaŭ prakamientavaŭ Jeŭraradyjo dopis pres-słužby MUS:

«My taksama vykarystoŭvajem «Pahoniu» i ŭsio čaściej schilajemsia da biełaruskaj movy. Škada, što majku z histaryčnym simvałam nadziavajuć bany [ad «bon», «bonchied» — słenhavaje słova na nieanacyst]. Ale heta śviedčyć pra ahulnuju papularnaść simvała. Heta trend. Nie treba źmiešvać Pahoniu z palitykaj. Pahonia — heta vieličnaść biełaruskaj historyi. Adukavany čałaviek i patryjot Biełarusi nie moža admaŭlać značnaści hetaha simvału»

• 0
• 0
• 0
• 0
• 0
• 0
• 0
• 0