Małady cyhan zakachaŭsia ŭ žonku brata – i razam z paluboŭnicaj zabiŭ i brata, i svaich baćkoŭ
Historyja kachańnia skončyłasia trahiedyjaj.
17 kastryčnika minułaha hoda na ŭskrajku Žłobina znajšli zhareŭšy bieły «Žyhulonak». U im lažali try abharełyja trupy.
Vyśvietliłasia, što zahinuła cełaja siamja: 53-hadovy Uładzimir Ankoŭski, jaho žonka, 49-hadovaja Valancina i ich 30-hadovy syn Mikałaj. Usie jany žyli ŭ Žłobinie.
Śledčyja zaviali kryminalnuju spravu pa zabojstvie. Chutka, ŭžo praz sutki, źjavilisia i pieršyja padazravanyja — małodšy syn zabitych i jaho niaviestka, žonka zabitaha brata.
Vyśvietliłasia, što na zabojstva svajakoŭ ich šturchnuła kachańnie.
Alaksandru i Rubinie było pa 22 hady. Aboje jany, jak i ich zahinułyja svajaki, – z narodu roma, ci, praściej kažučy, cyhany. Aboje majuć adukacyju šeść kłasaŭ. Žyli vialikaj siamjoj usie razam, i baćki, i dva braty, starejšy ź jakich, Mikałaj i byŭ žanaty z Rubinaj. U ich było dvoje maleńkich dziaciej. Alaksandr, małodšy brat, taksama byŭ žanaty, i mieŭ ažno traich małych dziaciej, ale ž sa svajoj žonkaj nie žyŭ.
Niečakana pamiž Alaksandram i Rubinaj uspychnuli pačućci. Pa słovach susiedziaŭ, pryčynaj zdrady mužu moh być i pryniaty ŭ cyhanaŭ rańni šlub – Rubina aficyjna nie była zamužam, ale žyła ź Mikałajem z 14 hadoŭ.
Pra stasunki daviedalisia baćki. Samo saboj, jany vykazalisia suprać. I para nie prydumała ničoha lepšaha, jak zabić usich svaich svajakoŭ. Ich pa čarzie vyvodzili u dvor, dzie da śmierci zabivali pałkaj i nažom, paviedamlaŭ v.a. načalnika kryminalnaj milicyi Žłobinskaha RUUS Dźmitryj Tatarynaŭ. Zatym cieły zakinuli ŭ VAZ «šaściorku», advieźli ŭ les i padpalili razam z mašynaj.
Spačatku Alaksandr i Rubina sprabavali pierakanać śledčych, što adčuvajuć bol i smutak pa zahinułych svajakach. Adnak pad ciskam dokazaŭ i ŭlik stała zrazumieła, što zabojstva – ich sprava.
19 listapada hetaha hoda Homielski abłasny sud pačaŭ słuchańni kryminalnaj spravy pa trajnym zabojstvie. Sudovaje pasiedžańnie pa chadajnictvie abvinavačanych projdzie ŭ zakrytym režymie. Pra heta prasili sami abvinavačanyja, matyvujučy heta niežadańniem, kab pry prysutnych ahučvalisia padrabiaznaści ich asabistaha žyćcia. Za zabojstva traich čałaviek Alaksandru pahražaje śmiarotnaje pakarańnie. Biełaruskaje zakanadaŭstva nie praduhledžvaje takoje ž pakarańnie dla žančyn, tamu Rubina moža atrymać maksimum - 25 hadoŭ pazbaŭleńnia voli.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary