Ekśpiertnaja kamisija Bresckaj vobłaści pa acency infarmacyjnaj pradukcyi ŭstanaviła, što dźvie knihi aŭtarstva Zianona Paźniaka «ŭtrymlivajuć prykmiety prajavy ekstremizmu». Havorka idzie pra knihi «Dobraja fatahrafija» i «Abarona Kurapataŭ. Narodny miemaryjał».
Adkazny sakratar upravy sojma Kansiervatyŭna-chryścijanskaj partyi-BNF Aleś Čacholski raspavioŭ, što 27 vieraśnia jon pierasiakaŭ biełaruska-polskuju miažu ŭ Breście. Vioz z saboj «dla asabistaha karystańnia» knihi: «Abarona Kurapataŭ. Narodny miemaryjał» (aŭtary — Zianon Paźniak i Valeryj Bujvał) i try knihi Zianona Paźniaka — «Dobraja fatahrafija», «Sesija niezaležnaści» i «Terra Dej». Pa troch z čatyroch u mytnikaŭ paŭstali pytańni — ich zatrymali «dla praviadzieńnia pravieračnych mierapryjemstvaŭ».
«Ja pradjaviŭ na mytnaj miažy knihi Paźniaka — praz peŭny čas hetyja knihi byli zabrany ŭ mianie i nakiravany ŭ kamisiju pry abłasnym vykanaŭčym kamitecie, — raspavioŭ Aleś Čacholski. — Tam dajuć vyznačeńnie, jość tam prykmiety ekstremizmu ci niama. Praz peŭny čas mnie pryjšoŭ list, dzie havorycca, što ŭ knihach «Dobraja fatahrafija» i «Abarona Kurapataŭ. Narodny miemaryjał» utrymlivajucca prykmiety ekstremizma».
Na rukach u Čacholskaha — kopija zajavy Bresckaj mytni ŭ sud Maskoŭskaha rajona Bresta, dzie mytniki prosiać pryznać dźvie knihi Zianona Paźniaka ekstremisckimi materyjałami. Da knihi «Sesija niezaležnaści» pretenzij nie vystaŭlajecca.
Jak raspavioŭ pradstaŭnik KCHP-BNF, u Minsku jaho ŭžo vyklikaŭ učastkovy inśpiektar Frunzienskaha rajona.
«Jon pravioŭ apytańnie. Akazvajecca, akramia dasłanych mnie papieraŭ, ich dasłali jašče i ŭ našaje RUVD, kab vyjavili, ci jość u maich dziejańniach administracyjnyja pravaparušeńni. U nas jość artykuł 17, častka 11, u Administracyjnym kodeksie, jaki hučyć tak: «Izhotovlenije, chranienije i rasprostranienije ekstriemistskoj litieratury». Pa ŭsich troch punktach ja daŭ tłumačeńnie, što ja nie vyrablaju, nie zachoŭvaju i, tym bolš, nie raspaŭsiudžvaju. Ja nie chavaŭ hetyja knihi, ja ich zadekłaravaŭ. Jakija mohuć być da mianie pretenzii?»
Aleś Čacholski kaža, što razam ź inšymi materyjałami jamu abaviazany byli jak zacikaŭlenaj asobie dasłać kopiju ekśpiertnaha zaklučeńnia:
«My ž da hetaha času nie viedajem, što takoje ekstremisckaje ŭ hetych zaklučeńniach…»
Aleś Čacholski aburany situacyjaj i ŭpeŭnieny, što knihi nielha ličyć ekstremisckimi.
«Zianon Paźniak — čałaviek vielmi talenavity. U jaho jość fatahrafija, knihi vieršaŭ. Ź imiem Paźniaka źviazana adkryćcio praŭdy pra Kurapaty» (U haziecie «Litaratura i mastactva» ŭ 1987 hodzie byŭ nadrukavany artykuł Paźniaka «Kurapaty - daroha śmierci»).
Čacholski ličyć, što situacyja ŭźnikła tamu, što praz mnohija hady Zianonu Paźniaku nie mohuć daravać «praŭdu pra Kurapaty».
Heta ŭžo nie pieršy incydent na mytni z knihami Zianona Paźniaka: Hrodzienskaja mytnia ŭžo kanfiskoŭvała knihu «Terra Dej». Adnak u lutym 2015 śpiecyjalnaja kamisija vyniesła ekśpiertnaje zaklučeńnie — prykmiet ekstremizmu ŭ toj knizie nie znajšli.
Namieśnik staršyni KCHP-BNF Juraś Bieleńki da apoviadu kalehi dadaŭ, što Paźniaku, jaki emihravaŭ u 1996 hodzie, da hetaha času niebiaśpiečna viartacca ŭ Biełaruś.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary