Sioleta ad chatniaha hvałtu zahinuli amal 100 čałaviek

U studzieni—kastryčniku hetaha hoda ad chatniaha hvałtu ŭ Biełarusi zahinuli amal 96 čałaviek, jašče 169 atrymali ciažkija cialesnyja paškodžańni. Pra heta na pres-kanfierencyi 25 listapada paviedamiŭ načalnik upraŭleńnia prafiłaktyki hałoŭnaha ŭpraŭleńnia achovy pravaparadku i prafiłaktyki milicyi hramadskaj biaśpieki Ministerstva ŭnutranych spraŭ Aleh Karaziej.

«Pry hetym treba razumieć, što jość takija ciažkija cialesnyja paškodžańni, jakija zakančvajucca śmierciu», — skazaŭ jon, dadaŭšy, što ŭ cełym ad chatniaha hvałtu štohod hinuć da 150 čałaviek.

Za 10 miesiacaŭ taksama zarehistravanyja bolš jak 42 tysiačy administracyjnych pravaparušeńniaŭ u pobycie, u toj čas jak za ŭvieś 2012 hod ich było kala 31 tysiačy. Pavieličeńnie, jak rastłumačyŭ Karaziej, źviazanaje z uviadzieńniem u siaredzinie 2013 hoda administracyjnaj adkaznaści za naniasieńnie pabojaŭ, jakoje nie mieła vynikam pryčynieńnie cialesnych paškodžańniaŭ, naŭmysnaje naniasieńnie bolu, fizičnych ci psichičnych pakutaŭ, učynienych u dačynieńni da člena siamji.

Aprača taho, u studzieni—kastryčniku vydadziena 1.128 achoŭnych pradpisańniaŭ, u tym liku 919 — z abaviazacielstvam časova pakinuć ahulnaje žyłoje pamiaškańnie. «My bačym, što hetaja miera efiektyŭnaja. My atrymlivajem zvarotnuju suviaź ad achviaraŭ hvałtu ŭ siamji, da mužoŭ jakich prymianialisia achoŭnyja pradpisańni, my razmaŭlajem z našymi supracoŭnikami, jakija vynosili takija pradpisańni i kantralavali ich vykanańnie, i bačym, što hetaja miera prymušaje ahresara surjozna zadumacca ab dalejšych pavodzinach», — zaznačyŭ pradstaŭnik MUS.

Zaraz pry nievykanańni pradpisańnia parušalniki pryciahvajucca da adkaznaści za niepadparadkavańnie zakonnym patrabavańniam supracoŭnika milicyi, ale ŭ pierśpiektyvie KoAP płanujecca dapoŭnić asobnym artykułam, jaki praduhledžvaje adkaznaść za nievykanańnie achoŭnaha pradpisańnia, paviedamiŭ Karaziej.

U ahulnaj kolkaści pravaparušeńniaŭ i złačynstvaŭ u pobycie, pavodle jaho słoŭ, žančyny vystupajuć ahresarami tolki ŭ 5% vypadkaŭ, ale razam z tym imi ŭčyniajecca kožnaje treciaje zabojstva ŭ siamji. «Čamu heta adbyvajecca? Spačatku idzie ahresija i hvałt z boku muža, partniora, i žančyna, razumiejučy, što zaraz jaje žorstka pabjuć, chapaje hety nož i jak vynik — ciažkija cialesnyja paškodžańni, a inšy raz i pazbaŭleńnie žyćcia», — rastłumačyŭ śpiecyjalist.

• 0
• 0
• 0
• 0
• 0
• 0
• 0
• 0