Biełstat z 2016 hoda źmienić mietodyku padliku VUP

Nacyjanalny statystyčny kamitet Biełarusi z 1 studzienia 2016 hoda ŭvodzić mižnarodny standart SNS-2008, paviedamili ŭ Biełstacie.

Standart SNS-2008 raspracavany pad ehidaj Statystyčnaj kamisii AAN i ŭličvaje apošnija tendencyi suśvietnaj ekanomiki. Na SNS-2008 pierajšli krainy ES, ZŠA, Kanada, płan pa ŭkaranieńni SNS-2008 raspracavany ŭ kožnaj z krain SND.

U abnoŭlenym standarcie praduhledžana pryncypova novaja traktoŭka šeraha važnych ekanamičnych apieracyj. Heta adlustravańnie raschodaŭ na navukova-daśledčuju dziejnaść, vajennych raschodaŭ, pasłuh finansavaha pasrednictva, pasłuh pa pražyvańni va ŭłasnym žylli. Źmianieńni zakranuć usie try mietady raźliku VUP — vytvorčy mietad, mietad vykarystańnia dachodaŭ i mietad farmiravańnia VUP pa krynicach dachodaŭ.

Tak, pry raźliku VUP vytvorčym mietadam źmienšycca pramiežkavaje spažyvańnie i pavialičycca vałavaja dabaŭlenaja vartaść. Pry raźliku mietadam kančatkovaha vykarystańnia źmienšacca raschody na kančatkovaje spažyvańnie siektara dziaržkiravańnia i pavialičycca vałavoje nakapleńnie asnoŭnaha kapitału. Upłyŭ hetaha źmianieńnia na VUP u dynamicy za 3 hady viadzie da rostu VUP u siarednim na 0,5 pracenta.

SNS-2008 taksama rekamienduje kłasifikavać sistemy ŭzbrajeńnia ŭ jakaści asnoŭnych srodkaŭ. Raschody na ŭzbrajeńnie, termin vykarystańnia jakich pieravyšaje 1 hod, pavinny być pieraniesieny z pramiežkavaha spažyvańnia ŭ vałavoje nakapleńnie, što pryviadzie da pavieličeńnia abjomu VUP.

Pasłuhi finansavaha pasrednictva, jakija vymiarajucca ŭskosnym čynam (PFPVU), raniej vyłučalisia ŭ asobny vid ekanamičnaj dziejnaści. Pry raźliku VUP u adpaviednaści z SNS-2008 vieličynia PFPVU, uklučanaja ŭ pramiežkavaje spažyvańnie, źmienšycca, što pavialičyć VUP.

Abnoŭleny padychod da ŭliku pasłuh pa pražyvańni va ŭłasnym žylli taksama pryviadzie da rostu VUP.

Bolšaść krain, jakija ŭkaranili SNS-2008, uklučyli niezakonnuju dziejnaść u abjom VUP. Heta vytvorčaść i raspaŭsiudžvańnie narkotykaŭ, prastytucyja, kantrabanda ałkaholu, tytuniu. «Asnoŭnaj prablemaj dla Biełarusi pry vyvučeńni hetaha napramku źjaŭlajecca padbor abjektyŭnych krynic infarmacyi. Acenka, zroblenaja na asnovie danych MUS i ekśpiertnych mierkavańniaŭ, pakazała niaznačny abjom takoj dziejnaści. Tamu niezakonnaja dziejnaść nie znojdzie adlustravańnia ŭ składzie VUP», — rastłumačyli ŭ Biełstacie.

U adpaviednaści z novymi mietadałahičnymi padychodami absalutnaja vieličynia VUP za 2012 hod pavialičycca na 3,4 pracenta. Abnoŭlenyja padychody taksama znojduć adlustravańnie ŭ raźlikach VRP abłaściej i Minska.

• 0
• 0
• 0
• 0
• 0
• 0
• 0
• 0