Palaki majuć namier prafinansavać ramont polskich vajskovych mohiłak u Breście

Rada achovy pamiaci baraćby i pakutnictva Polščy maje namier prainviestavać dobraŭparadkavańnie voinskich pachavańniaŭ suajčyńnikaŭ u Breście. Heta pytańnie abmiarkoŭvałasia siońnia na sustrečy pradstaŭnikoŭ arhanizacyi z kiraŭnictvam Bresckaha abłvykankama.

U Breście jość troje voinskich mohiłak, dzie ŭ pieryjad z 1920 pa 1939 hod byli pachavanyja polskija vajskoŭcy. Pradstaŭniki dziaržaŭnaj arhanizacyi, jakaja zajmajecca ušanavańniem pamiaci ab histaryčnych padziejach, naviedali kožnaja ź ich i zastalisia zadavolenyja ŭbačanym. «My bačyli troje polskich vajennych mohiłak u Breście. Kožnyja ź ich patrabujuć vialikich inviestycyj dla ramontu, ale vidać, što jany dahledžanyja, i za heta my vykazvajem padziaku biełaruskim uładam», — adznačyŭ sakratar rady achovy pamiaci Andžej Kunert.

Jon paviedamiŭ pra hatoŭnaść polskaha boku inviestavać u kapitalny ramont dvuch voinskich mohiłak, adny ź jakich raźmieščany na paŭnočnaj ŭskrainie Harnizonnych mohiłak, inšyja — u mikrarajonie Adamkava. Da prac płanujecca prystupić ŭžo viasnoj 2016 hoda. Pa słovach Andžeja Kunerta, u Polščy štohod ramantujecca 100-120 voinskich pachavańniaŭ. U 2013-2014 hadach były adramantavanyja samyja vialikija ŭ Varšavie vajskovyja mohiłki, dzie pachavana bolš za 104 tysiač sałdat. Košt ramontu skłaŭ 1,5 młn jeŭra. Akramia taho, za apošnija 5 hadoŭ namahańniami rady adnoŭleny mohiłki polskich vajskoŭcaŭ u Italii, Indyi, Uźbiekistanie, Kazachstanie, Kyrhyzstanie, Uhandzie, Francyi, Hiermanii, Šviejcaryi. U Biełarusi hetuju pracu vyrašana pačać z Bresta.

Namieśnik staršyni Bresckaha abłvykankama Leanid Cupryk adznačyŭ, što achova i padtrymańnie paradku na historyka-kulturnych abjektach, voinskich pachavańniach — vysakarodnaja zadača, jakaja blizkaja biełarusam hetak ža, jak i palakam. Bolš taho, u vobłaści jość vopyt uzajemadziejańnia z zamiežnymi dziaržaŭnymi i hramadskimi arhanizacyjami pa hetym pytańni. U pryvatnaści, ciesnyja kantakty ŭstalavanyja z Narodnym sajuzam Hiermanii pa dohladzie za vajennymi pachavańniami. Vałanciory abłasnoj arhanizacyi BRSM i Sajuza sielskaj polskaj moładzi dobraŭparadkoŭvajuć pachavańnia savieckich voinaŭ pad horadam Biała-Padlaska ŭ Polščy. Doŭhi čas miascovyja orhany ŭłady akazvajuć sadziejničańnie polskamu boku ŭ adnaŭleńni kaścioła ŭ vioscy Voŭčyn Kamianieckaha rajona.

«Heta tolki umacoŭvaje davier pamiž narodami, vychoŭvaje pavažlivaje staŭleńnie ŭ moładzi da pamiaci zahinułych, da svajoj historyi. Heta vielmi važna», — skazaŭ Leanid Cupryk. Jon taksama prapanavaŭ abmierkavać pytańnie ab vajskovym pachavańni ŭ vioscy Dubroŭka Drahičynskaha rajona. Pošukavy bataljon Ministerstva abarony niekalki hadoŭ tamu vyjaviŭ tam pareštki vajennasłužačych, mierkavana — polskich žaŭnieraŭ. «Asoby z polskaha boku, jakija kuryravali hetuju pracu, zahinuli ŭ avijakatastrofie ŭ 2010 hodzie. Dumaju, hetyja raskopki treba praciahnuć», — vykazaŭ mierkavańnie vice-hubiernatar.

Usiaho na terytoryi Bresckaj vobłaści znachodzicca 874 voinskich pachavańni, u tym liku 18 zamiežnych, ź jakich 9 — polskija. Jość taksama 26 źmiešanych pachavańniaŭ, u šaści ź jakich pachavanyja polskija hramadzianie. Ahulnaja kolkaść zahinułych i pachavanych na terytoryi vobłaści voinaŭ składaje 421 895 čałaviek, ź jakich vyśvietlenyja imiony 52 681 čałavieka.

• 0
• 0
• 0
• 0
• 0
• 0
• 0
• 0