Rasijskaja avijacyja, jakaja dziejničaje ŭ Siryi, budzie vykonvać zadańni pad prykryćciom rasijskich SPA «na vypadak adnaŭleńnia niebiaśpieki», zajaviŭ pres-sakratar Uładzimira Pucina Dźmitryj Piaskoŭ u intervju prahramie «Viesti v subbotu». Taksama jon adznačyŭ, što kaardynacyja palotaŭ pamiž RF i Turcyjaj u rehijonie prypynienaja.
«Možna kanstatavać tolki adno: rasijskija lotčyki zastrachavany na vypadak adnaŭleńnia niebiaśpieki, adpaviednaja sistema SPA ŭstalavanaja», — skazaŭ Piaskoŭ.
Raniej ministr abarony Siarhiej Šajhu zajaŭlaŭ, što Rasija pierakinie na siryjskuju avijabazu «Chiejmim» najnoŭšy zienitna-rakietny kompleks S-400.
Raniejšyja kantakty pamiž rasijskimi i tureckimi vajskoŭcami prypynienyja. «My z vami napiaredadni čuli zajavu našaha Hienštaba i minabarony ab prypynieńni ŭsich kantaktaŭ pa linii vajennych z Tureckaj respublikaj. Adpaviedna, prypynienaja «haračaja linija», jakaja śpiecyjalna była stvorana dla praduchileńnia niebiaśpiečnych incydentaŭ», - skazaŭ Piaskoŭ.
Pry hetym pradstaŭnik prezidenta Pucina nazvaŭ papiaredžańnie prezidenta Redžepa Erdahana pra toje, što Turcyja budzie ličyć ataku suprać svajho samalota ŭ siryjskim niebie aktam ahresii, «teatram absurdu».
«Heta ž naohuł žachlivy niuans. Heta značyć, prezident Turcyi zrabiŭ zajavu, u jakoj skazaŭ, što kali turecki samalot budzie źbity nad terytoryjaj Siryi, to heta budzie ličycca aktam ahresii», — skazaŭ Piaskoŭ.
Adnosiny pamiž Rasijaj i Turcyjaj rezka pahoršylisia paśla incydentu 24 listapada, kali rasijski bambavik Su-24 byŭ źbity tureckimi VPS.