Svajačka sieryjnaha hvałtaŭnika: Heta zdaryłasia i sa mnoj. Mnie było hadoŭ 8

U siaredzinie listapada biełaruskija pravaachoŭniki raskazali pra zatrymańnie adnaho z samych padstupnych i brudnych zładziejaŭ u historyi suvierennaj Biełarusi. Pakul Aleha B. padazrajuć u dziasiatkach zhvałtavańniaŭ tolki na terytoryi našaj krainy. A napadzieńni na žančyn jon ładziŭ i ŭ Polščy, i ŭ Rasii.

Zatrymać jaho ŭ Biełarusi nie mahli bolš za 20 hadoŭ. Možna tolki ŭjavić, kolki zhvałtavańniaŭ mahło być ździejśniena za hety čas.

Jeŭraradyjo źviazvajecca z Marynaj (imia źmienienaje, — Jeŭraradyjo), blizkaj svajačkaj Aleha B. Pytajemsia, ci vieryć jana, što čałaviek, jakoha jana dobra viedaje i ź jakim padtrymlivaje suviaź, zdolny na takija złačynstvy. 

Maryna: Ja navat nie viedaju, što vam skazać. 50 na 50.

Jeŭraradyjo: Kali vy tak kažacie, to, napeŭna, viedajecie pra niejkija zhvałtavańni. Ci, moža być, pra niejkija inšyja zvanočki?

Maryna: Jak vam skazać, było takoje, było…

Jeŭraradyjo: Vy majecie na ŭvazie kankretnyja kryminalnyja spravy, raspačatyja na Aleha, ci niešta jašče?

Maryna: Ja jašče pra niešta viedaju.

Jeŭraradyjo: Ci možacie raskazać?

Maryna: Heta toje samaje, za što jaho zatrymali… Niekalki vypadkaŭ viedaju. Kali ščyra, kali nie budzie imionaŭ… Heta zdaryłasia sa mnoj. Mnie było hadoŭ vosiem, moža, dzieviać. Jon byŭ hadoŭ na dziesiać starejšy. Ale ŭsio prachodzić. Vy viedajecie, stolki hadoŭ maŭčaŭšy, navat lahčej stała.

Jeŭraradyjo: Inšyja svajaki viedali, što zdaryłasia?

Maryna: Nie. U našaj siamji jon zaŭždy byŭ lubimčykam. Moža być, jaho maci niešta i viedała. Chacia b pra toje, za što jon byŭ asudžany ŭ Polščy. Ale nam tady kazali, što nibyta jon trapiŭ u avaryju pad Maskvoj i za heta siadzieŭ. Jamu nibyta daviałosia rabić i płastyčnuju apieracyju na tvary paśla toj avaryi. Źmieny ŭ jaho źniešnaści sapraŭdy jość. Heta hučała praŭdapadobna, tamu što jon pracavaŭ kiroŭcam. U Minsku vadziŭ aŭtobus, u Maskvie i Piciery — maršrutki. Kali jon pryjazdžaŭ, ja starałasia bolš znachodzicca ci na pracy, ci trymacca ŭbaku. Pavitalisia, i ŭsio.

Jeŭraradyjo: Što na jaho paŭpłyvała, čamu staŭ takim?

Maryna: Napeŭna, jon nie lubić, kali jamu admaŭlajuć.

Jeŭraradyjo: Ci hvałciŭ jon kaho-niebudź z vašych znajomych?

Maryna: Było viasielle ŭ svajakoŭ. Tam usie byli napadpitku. Dyk voś, śviedka skazała, što jon chacieŭ jaje zhvałcić, sprabavaŭ uziać siłaj. U jaho nie atrymałasia. Usio heta ŭ vyniku śpisali na ałkahol…

Aleh B., pavodle viersii pravaachoŭnikaŭ, napadaŭ na žančyn, hvałciŭ i adbiraŭ u ich kaštoŭnyja rečy. Viadoma, što jon vioŭ dastatkova zdarovy ład žyćcia, chadziŭ u trenažornuju zału, sprabavaŭ pakazać siabie dobrym siemjaninam.

U 2000 hodzie jaho złavili za zhvałtavańnie ŭ Polščy i pasadzili. U 2008 hodzie sud Tušynskaha rajona Maskvy paśla adnaho sa zhvałtavańniaŭ pryznaŭ Aleha B. niezdarovym psichična i nakiravaŭ na lačeńnie. U chutkim časie hvałtaŭnik vyjšaŭ na volu i moh praciahvać napadać na žančyn.

• 0
• 0
• 0
• 0
• 0
• 0
• 0
• 0