10 śniežnia Śviatłana Aleksijevič atrymaje Nobieleŭskuju premiju z ruk šviedskaha karala. U aeraport biełaruskuju piśmieńnicu pravodzili žurnalisty, svajaki i siabry.
![](http://nnexpictures.fra1.digitaloceanspaces.com/img/w732d4webp1/photos/z_2015_12/10_aleksievich_aeroport_zam_tutby_phsl_02122015-rpn3y.jpg.webp)
Adkazvajučy na pytańnie žurnalistaŭ, jak jana rychtavałasia da pajezdki, Śviatłana Aleksijevič raspaviała, što pačała źbiracca ŭ 2 hadziny nočy. Jana taksama skončyła pisać tekst dvuch svaich lekcyj — adna lekcyja Nobieleŭskaha łaŭreata, u joj budzie iści havorka pra pracu i knihi, druhuju jana pračytaje na bankiecie — u hetaj pramovie jana raskaža ŭ tym liku i pra siońniašniuju Biełaruś.
Zbory na ŭručeńnie Nobieleŭskuju premiju piśmieńnica nazvała «vielmi varjackaj spravaj».
Pa prośbie karespandenta TUT.BY jana prakamientavała infarmacyju pra toje, što biełaruskija kanały nie buduć tranślavać cyrymoniju ŭručeńnia premii.
«Było b dziŭna, kali b prapuścili. Ja nie sumniavałasia, što tak budzie», — skazała Aleksijevič. Takoje rašeńnie telekanałaŭ jana tłumačyć «čałaviečymi jakaściami našaha prezidenta».
![](http://nnexpictures.fra1.digitaloceanspaces.com/img/w732d4webp1/photos/z_2015_12/09_aleksievich_aeroport_zam_tutby_phsl_02122015-fpimj.jpg.webp)
«Ja nie dumaju, što heta z-za našych roznahałośsiaŭ, chutčej za ŭsio, heta reŭnaść. Jon u nas adzin. Mianie raduje, što ludzi na heta reahujuć… A što prezidenty? Jaki strašny byŭ Stalin, i dzie jon? Dzie Brežnieŭ? Dziŭna, što aŭtarytarnyja kiraŭniki hetaha nie razumiejuć. Voś Aŭhustyn Bažavolny zastajecca, jaki ŭsio razdaŭ biednym i razmaŭlaŭ z ptuškami», — ličyć piśmieńnica.
Na pytańnie, ci stali jaje bolš čytać paśla atrymańnia Nobieleŭskaj premii, jana adkazała, što joj składana prasačyć, ale miarkujučy pa tym, što pišuć u internecie, cikavaści stała bolš: «Z-za taho što šmat sprečak, asabliva reakcyja Rasii ździviła mnohich, takaja ahresiŭnaja reakcyja».
«I ŭsio ž taki heta pryznańnie Biełarusi, taho, što my jość na karcie», — adznačyła Aleksijevič.
![](http://nnexpictures.fra1.digitaloceanspaces.com/img/w732d4webp1/photos/z_2015_12/14_aleksievich_aeroport_zam_tutby_phsl_02122015-hxm5q.jpg.webp)
Razam z tym jana padkreśliła, što jaje knihi pavinny byli być napisany na ruskaj movie.
«Ja pisała historyju Utopii [mastacka-dakumientalny cykł «Hałasy utopii», piać knih, u jakich «maleńki čałaviek» sam raspaviadaje pra čas i pra siabie], Utopija havaryła pa-rusku. Heta była vielizarnaja kraina. Tam žyli i ruskija, i ŭkraincy, i tadžyki, tamu heta pavinna było być pa-rusku. U Irłandyi ž pišuć pa-anhielsku. U śviecie ciapier usio vielmi źmiašana, i stavić niejkija takija miežy, heta ŭžo minułaje. Mova nie vyrašyć našych prablem», — skazała Aleksijevič, adkazvajučy na pytańnie, čamu jana nie piša na biełaruskaj movie.
Kampanija «Biełavija» pa ŭłasnaj inicyjatyvie vyłučyła Aleksijevič miesca ŭ biznes-kłasie.
![](http://nnexpictures.fra1.digitaloceanspaces.com/img/w732d4webp1/photos/z_2015_12/05_aleksievich_aeroport_zam_tutby_phsl_02122015-vdcx1.jpg.webp)
U Stakholmie pres-ataše Śviatłany Aleksijevič budzie były pasoł Šviecyi ŭ Biełarusi Stefan Eryksan. U pajezdcy, na cyrymonii ŭručeńnia Nobieleŭskaj premii i na ŭračystym bankiecie piśmieńnicu buduć supravadžać 14 čałaviek ź Biełarusi — jaje siabry.
Z 6 pa 12 śniežnia ŭ šviedskaj stalicy praciahniecca tydzień nobieleŭskich uračystaściaŭ. Łaŭreaty praviaduć pres-kanfierencyi, paŭdzielničajuć u dyskusijach i skažuć nobieleŭskija pramovy. 10 śniežnia ŭ stakholmskaj fiłarmonii karol Šviecyi Karł XVI Hustaŭ uručyć miedali i dypłomy Nobieleŭskaj premii. Pamier hrašovaj uznaharody ŭ hetym hodzie składaje 8 młn šviedskich kron, abo kala 970 tysiač dalaraŭ.
Kamientary