U chutkim časie moža być pavyšany košt prajezdu ŭ staličnym hramadskim transparcie
U chutkim časie moža być pavyšany košt prajezdu ŭ hramadskim transparcie Minska, paviedamiŭ na pres-kanfierencyi 9 śniežnia dyrektar dziaržaŭnaj ustanovy «Staličny transpart i suviaź» Valeryj Škurataŭ.
Pavodle jaho słoŭ, jość płany pa pavyšeńni taryfaŭ, «jakija raspracavała Minekanomiki i jakija zaćvierdžanyja». «Pa ich budzie pavyšany taryf. Ja dumaju, što nieŭzabavie buduć pryniatyja niejkija rašeńni pa pavyšeńni. Budziem pavyšać, bo ceny vyraśli na ciepła- i elektraenierhiju bolš čym na 40%, a heta ŭsio — raschody pradpryjemstvaŭ. Vialikija subsidyi im nichto nie daść, vyznačanyja krynicy finansavańnia, usio astatniaje treba źbirać samim. Kali siońnia nie padniać canu, to zaŭtra nie budzie čym płacić zarpłatu, kuplać paliva, šyny. Napieradzie zima, i raschody ŭ hety pieryjad na paradak vyšejšyja», — zaznačyŭ Škurataŭ.
Košt adnoj pajezdki ŭ hramadskim transparcie Minska składaje 4.500 rubloŭ.
Škurataŭ taksama zaznačyŭ, što ŭsio bolš pasažyraŭ pierachodziać na apłatu prajezdu z dapamohaj bieskantaktnych smart-kartak (BSK) i admaŭlajucca ad apłaty razavych pajezdak jak u mietro, tak i ŭ naziemnym transparcie.
Dola pasažyraŭ, jakija apłačvajuć adnu pajezdku, źniziłasia da 30%.
«Treba bolš apieratyŭna reahavać na hetyja tendencyi, prapanoŭvać nasielnictvu skidki pry kupli BSK na termin abo šmatrazovyja pajezdki. U pierśpiektyvie treba pradavać nie na miesiac ci dva, a na kvartał ci hod. Čałaviek moža inviestavać u bilet na hod. U mnohich krainach jon na 50% tańniejšy», — skazaŭ dyrektar pradpryjemstva.
Na zaŭvahu žurnalistaŭ, što ekanamisty transpartnych pradpryjemstvaŭ ličać heta niemahčymym z-za vysokaha ŭzroŭniu inflacyi, Škurataŭ zajaviŭ: «Takaja prablema siońnia jość. Dva-try hady tamu ŭ nas byli narmalnyja inflacyjnyja pracesy — 9-10%. Ale kali ŭ nas inflacyja zaškalvaje, pytańnie ŭpirajecca ŭ ekanomiku. Ale prodaž na praciahły termin moža być apraŭdany».
Razam z tym jon adznačyŭ prablemu bieźbiletnaha prajezdu. «Zajcy» ŭ nas prysutničajuć i ŭ Biełarusi, i ŭ Minsku. Ich pracent istotny, a heta istotna ŭpłyvaje na ekanomiku pradpryjemstva. Biudžetu davodzicca kampiensavać i hetyja raschody», — skazaŭ Škurataŭ.
Kamientary