Były hienieralny dyrektar baskietbolnaha kłuba «Cmoki-Minsk» Kanstancin Šaraviera nie pryznaŭ siabie vinavatym u złačynstvach, jakija jamu inkryminujucca. Pra heta jon zajaviŭ 17 śniežnia na słuchańniach u sudzie Maskoŭskaha rajona stalicy paśla abjaŭleńnia abvinavačvańnia.
Abvinavačvańnie staršy pamočnik prakurora Maskoŭskaha rajona Raman Biziuk začytvaŭ 16 i 17 śniežnia ahulnym likam bolš jak šeść hadzin.
Byłomu spartyŭnamu funkcyjanieru inkryminujecca kradziež šlacham złoŭžyvańnia słužbovymi paŭnamoctvami i złoŭžyvańnie słužbovymi paŭnamoctvami, što mieła vynikam ciažkija nastupstvy. Jon abvinavačvajecca va ŭčynieńni złačynstvaŭ, praduhledžanych č. 4 art. 210, č. 3 art. 424 i č. 2 art. 210 KK.
U pryvatnaści, Šaravieru stavicca ŭ vinu raskradańnie hrašovych srodkaŭ kłuba, zališnie naličanych rabotnikam i spartsmienam, na asnovie roźnicy ŭ pamiery ŭznaharodžańniaŭ u pryvatna ahavoranych hiendyrektaram i aficyjna aformlenych kantraktach. Sumy mahli adroźnivacca ŭ razy. Uron ad hetaj dziejnaści aceńvajecca bolš čym u 6,2 młrd. rubloŭ. Taksama Šaraviera abvinavačvajecca ŭ arhanizacyi vyvadu z abarotu kłuba srodkaŭ, što vydzialajucca na kampiensacyju charčavańnia spartsmienam padčas vučebna-trenirovačnych zboraŭ.
Złačynnyja epizody dziejnaści abvinavačvanaha adnosiacca da pieryjadu ź leta 2010 hoda pa 8 krasavika 2014 hoda.
Kanstancin Šaraviera znachodzicca pad vartaj z 14 krasavika 2015 hoda.
18 śniežnia ŭ sudovym pracesie pačniecca dopyt abvinavačvanaha.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary