THS zaklikaje ŭłady admovicca ad idei stvaryć adzinaha raspaŭsiudžvalnika zamiežnych ŚMI

Stvareńnie ŭ Biełarusi adzinaha raspaŭsiudžvalnika zamiežnych srodkaŭ masavaj infarmacyi budzie niehatyŭna ŭspryniataje suśvietnaj supolnaściu. Pra heta havorycca ŭ liście, jaki nakiravaŭ u Administracyju prezidenta, urad i Ministerstva zamiežnych spraŭ Telekamunikacyjny halinovy sajuz (THS).

THS ab`iadnoŭvaje kala 100 jurasob i IP z metaj sadziejničańnia raźvićciu ŭ Biełarusi kabielnaha i efirnaha telebačańnia, srodkaŭ suviazi i telekamunikacyj. 

List uładam adpraŭleny ŭ suviazi z padrychtoŭkaj ukaza ab stvareńni adzinaha dziaržaŭnaha raspaŭsiudžvalnika zamiežnych ŚMI. Stvareńnie takoj struktury supiarečyć zakonu «Ab srodkach masavaj infarmacyi», u jakim havorycca pra niedapuščalnaść manapalizacyi ŚMI, zaznačajecca ŭ liście THS. 

«Suśvietnaja i jeŭrapiejskaja supolnaść z ulikam mižnarodnaha zakanadaŭstva ŭsprymie stvareńnie takoj struktury jak abmiežavańnie svabody słova i infarmacyi na terytoryi našaj dziaržavy, što paciahnie paharšeńnie imidžu krainy, umoŭ (mahčymaści) davańnia mižnarodnaha kredytavańnia i ekanamičnaha supracoŭnictva», — padkreślivajecca ŭ liście.

Na dumku jaho aŭtaraŭ, prapahanda dasiahnieńniaŭ Biełarusi ŭ suśvietnaj infarmacyjnaj prastory praz zamiežnyja ŚMI, čym abhruntoŭvajuć stvareńnie adzinaha dziaržraspaŭsiudžvalnika inicyjatary ŭkaza, mahčymaja z dapamohaj razavych akcyj z kožnym ŚMI. «Pastavić na pastajannuju asnovu takuju dziejnaść za miežami našaj krainy, naviazvajučy jaje partnioram, niemahčyma, navat sama prapanova vykliča niehatyŭnuju reakcyju ŭ pradstaŭnikoŭ usioj miedyjnaj supolnaści», — upeŭnienyja ŭ THS. 

U liście havorycca, što «halina ź ciažkaściu pieražyła zakanadaŭstva ŭ častcy padavańnia pasłuh suviazi, jakoje rehularna mianiajecca ŭ pieryjad ź siaredziny 2013 hoda». THS prosić kiraŭnika Administracyi prezidenta Alaksandra Kosinca, prem`ier-ministra Andreja Kabiakova i ministra zamiežnych spraŭ Uładzimira Makieja ŭ ciažki dla ŭsioj ekanomiki čas «pryniać miery pa praduchileńni destabilizacyi pracy pradpryjemstvaŭ» haliny.

Nahadajem, 29 śniežnia staršynia praŭleńnia THS Alena Klujkova paviedamiła BiełaPAN, što ŭkaz prezidenta ab stvareńni adzinaha dziaržaŭnaha dystryb`iutara zamiežnych ŚMI moža być pryniaty ŭžo bližejšymi dniami. Jana asabliva zaznačyła, što prajekt dakumienta raspracoŭvaŭsia biez pryciahnieńnia profilnych sajuzaŭ i pradstaŭnikoŭ biźniesu. 

Pavodle infarmacyi Klujkovaj, što ciapier u Biełarusi pracujuć prykładna dva dziasiatki dystryb`iutaraŭ, jakija pradstaŭlać pieravažna rasijskija telekanały, adnak bolšaść zamiežnych kanałaŭ pracujuć naŭprost z kabielnymi apieratarami. Ź`iaŭleńnie adzinaha dziarždystryb`iutara moža pryvieści da pavyšeńnia vypłat za tranślacyju telekanałaŭ i zakryćcia kabielnych apierataraŭ, jakija nie zmohuć pracavać u novych umovach i ŭ vyniku syduć z rynku. «Havaryć ab tym, što heta — rynak i na miesca adnych pryjduć inšyja, nie varta, tamu što z ulikam uviadzieńnia takich praviłaŭ i ahulnaj ekanamičnaj situacyi nichto ŭ hety apryjory stratny biźnies układvacca nie budzie», — miarkuje Klujkova.

• 0
• 0
• 0
• 0
• 0
• 0
• 0
• 0